Dizionari de Lenghe Furlane

lustri¹  lus|tri  [AF]

1. adi. che al slusiche, che al riflet la lûs:  si jerin cjatâts intun curtîl pavimentât di claps taronts e lustris tant che medaiis (Gianni Gregoricchio, Îr e doman); sul pôl che si alçave parsore il riul, cu lis sôs fueis lustris che a tremin simpri, un franzel al zornave (Pieri Menis, Chei di Muraie)
   Sin. lusignât , lusorôs , sflandorôs , slusignât
   
   1. cussì ben netât di rifleti la lûs:  dopo cene, te cusine cjalde, dute lustre, cun chel macet di garofui su la vetrine, si stave ben (Pieri Menis, Nadâl ancje par Gjelmin)
   2. s.m. il slusicâ, il rifleti la lûs:  [lis parts vernisadis de monture] se vessin piardût un pôc il lustri, si cjol un blec di pano, si lu implastra sutîl cun de la cera blancja, e cussì freantlis, tornin a cjapâ il lustri di prima (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera); un blancôr di agaç florît, un vert lusint di rôl, un lustri di fueis di cjastinâr che a tornavin a menâ dopo agns di murie (Alan Brusini, Par stradis lungjis)
2. s.m. prodot che, dât suntun materiâl, al fâs che al rifleti ben la lûs:  ai po cjapiel pontât / come domande il grât; / lu ai intenzût cul ingjustri, / lu ai ben ben sopressât i ai dât il lustri (Pieri Çorut, Une gnove citât in Friûl)
3. adi. dai voi, che a rifletin la lûs par vie che a àn plui lagrimis dal normâl, par vie di une emozion, di une malatie o altri:  siore Lise ju cjalà cun voi lustris di braùre (Maria Forte, Cjase di Dalban)
   Sin. lusint , slusint , lusignât , slusignât
4. adi. che al è plen di lûs, che al lasse passâ la lûs:  i uciei a svoletin di mats tal aiar lustri tant che un veri di sagre (Dino Virgili, La aghe da pît la cleve); une dì dal mês di Lui, une zornade lustre tant che un voli di uciel (Alan Brusini, Come tai romançs)
   Sin. cristalin , limpi , net , pûr² , rampit , seren , smondeât , spueât
5. adi. (ancje fig.) ben curât, ben montât, petenât, elegant:  al rive di buride in municipi un tenentin inglês, cence pêl su la muse, dut lustri, dut sprofumât e scuasi cence saludâ al mi domande se o ai cjatât cui che al podeve fâ il sindic (Pieri Somede dai Marcs, Al è muart Cercil); al jere capitât tal fogolâr de Dosche, subit dopo cene, lustri come un pavon (Meni Ucel, La ombrene)
6. adi. che al rive a pensâ cun clarece, che al mostre un pinsîr razionâl:  dopo sclopade la bombe al jere lustri e cussient (Pieri Menis, Chei di Muraie)
   
   1. di pinsîr, sensazion e v.i., che si forme o si sint cun clarece:  chel pinsîr duncje i vignì lustri ad in plen, intant che al misurave cuntun calcul mecanic ancjemò un viaç la distance di se dal flum (Agnul di Spere, Cjalant la rive)
7. s.m. alte considerazion sociâl:  chel mostrâsi in confidence cul comandant dai mucs, i dave un ciert lustri e, in rivuart ae int, se no si sintive stimât, si contentave di sei temût (Roberto Ongaro, Il muc); dai agns 90 dal secul passât a vuê il "lustri" de lenghe furlane al è dal sigûr cressût (Sandri Carrozzo, Autonomie e politiche linguistiche pal furlan)
   Sin. onôr , nom , innomine , considerazion , reputazion