Dizionari de Lenghe Furlane

franc  franc  [FO]

1. s.m. [TS] stor. tal pl., popul gjermanic antîc, che sot Carli il Grant, tal secul VIII al è rivât a dominâ grande part de Europe ocidentâl:  Aistolf e Desideri si urtarin cui papis e chescj a clamarin in jutori il re dai Francs, Carli il Grant (Josef Marchet, Cuintristorie dal Friûl fin sot la Italie)
   
   1. adi., s.m. di chel popul, che, cui che al faseve part di chel popul:  [Carli il Grant] la prime robe che al à fat al à cambiât il mût di dî messe culì; il rît aquileiês lu à butât jù lui e al à metût sù il messâl franc (Francesc Placerean, La nestre storie); Rotgaut e Gait di Vicence […] si metin in vuaite su la Livence e a menin un grant maçalizi di une prime armade francje che si moveve bande il Friûl (Sandri Carrozzo, Rotgaut e la politiche furlane langobarde)
   2. [TS] ling. lenghe gjermaniche ocidentâl altighe, fevelade dai Francs
2. adi., s.m. che, cui che si compuarte e al fevele in maniere vierte, clare, cence bausiis:  Catine [a sô sûr che e jere stade domandade di Masin] i veve dit francje: «Nol è par te… Al è un cjochele…» (Pieri Menis, Marum)
   Sin. arût , ladin¹ , leâl , onest , rampit , sclet , sincîr , vêr , viert
   
   1. pandût a clâr, cence platâ nuie, cence bausiis:  ognidun si jere infidât a dî la sô opinion francje e nete (Dino Virgili, Cjase Basse); chel tasê, cualchi volte, al sponzeve, par ducj i doi, plui che no un fevelâ franc (Dino Virgili, La aghe da pît la cleve)
3. av. cun scletece:  al pâr che a ducj al sei tornât il flât, a alcin la vôs, a discorin franc e cence sudizion (Josef Marchet, Autonomie dal spirt)
   Sin. a clâr , a palês , a viert , besclet , clâr , clâr e net , net e sclet , sclet
4. adi., s.m. che, cui che al fâs alc ben, cun sigurece, sveltece, cun bondance:  par capîlu [Jesù Bambin], che nol è ancjemò franc tal fevelâ, si a di tornâ fruts (Vigji Glovaz, Che nus feveli Jesù bambin); tu sês masse francje di mangjâ… tu mi costis une monede (Maria Forte, Il bal spisimât des ombrenis); franc dal so fat, franc dal so mistîr (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. decîs , dret , fer , fuart¹ , ladin¹ , salt² , sfrancjât , sigûr
   
   1. che al mostre sigurece, scletece:  o marcji par stradis mai viodudis, cun pas franc e sigûr, ancje se el cûr al è ansiôs (Arturo Feruglio, Viaç a Vignesie); un biel zovin, fuart, doi voi neris, muse francje, un pâr di mostacjutis e i cjavei nerons e riçs come un agnel (Dolfo Zorzut, La furlane)
   2. vêr, reâl:  i pareve di sintî come tun sium lis cjampanis de sô plêf […] e, dentri vie, chê le sintive francje, une grande lamiece di stomi (Riedo Pup, Viliacco)
      Sin. vêr , autentic , sigûr , ciert , patoc , reâl¹ , concret , pardabon , pardassen
   3. (enf.) ancje iron., tant che rinfuarcitîf:  judâts de pôre, des berladis e se mai covente ancje di cualchi francje sgnesule pe schene, di rif o di raf si rive ancjemò adore a jevâsi sù (Ivano Urli, Storie di Min)
      Sin. bon , biel
5. av. ben, cun sigurece, cun bondance:  cumò noaltris o capìn franc e net ce che a disin i grancj e alore, se lôr a contin cualchi barzalete, une robe e la altre, nô le imparìn a colp (AAVV, Sul florî)
6. adi. che nol à di jessi sometût a tassis, tribûts, oblics e sim:  il procediment [par tornâ a vê il cognon origjinâl te lenghe minoritarie] al è franc di spesis e al à di jessi sierât dentri di novante dîs de domande (Aministrazion Publiche, Leç 482/99)
   Sin. libar , viert , esent , esentât
7. s.m. [TS] numism. non de monede di aur batude pe prime volte in France tal 1360, doprât ancje par altris emissions sedi di monede francese sedi di altris bandis:  Ernest al metè sul banc doi francs [svuizars] (Agnul di Spere, In Friûl, nossere)
8. s.m. (pop.) ancje in riferiment ae lire taliane, in circolazion jenfri 1862 e 2002:  di Rome o vevin otignût un jutori di cinc mil francs impen di une spese che o vevin di pôc mancul di 145.000 (Pieri Somede dai Marcs, Lis nestris rosis)
   Sin. lire¹
9. s.m. (fig., pop.) monede, bêçs in gjenerâl:  mi à simpri plasût di lavorâ salt e tignî cont dal franc, ancje a mi (Josef Marchet, Lis predicjis dal muini)
   Sin. bêç , boro , brustul , carantan , centesim , clincar , craizar , crût , cuatrin , palanche , patan , sclanfar , sclanfe , solt , spinfar
   
   1. une cierte cuantitât di bêçs:  [Linùs] al jere puar di famee, tant che al scugnì lâ a cirî vore a Vilac, tant che tiessidôr. Al metè vie un franc, e a pene che al podè a vierzè a Mueç un laboratori di tiessidure dal lin (Adrian Cescje, Liniis di storie sociâl e economiche dal Friûl 1500 - 1800)
   2. cuantitât une vore piçule di bêçs:  par un franc e varès dade la anime al diaul e che no veve mai comprât nancje un façolet di nâs cence tratâi parsore (Pieri Menis, Il Signôr sul mûr de braide)

Polirematichis e espressions idiomatichis

• fâle francje loc.v.

Proverbis:

• il franc ur sta tal cjâf a ducj
• l'om franc si cuiste la stime di ognidun