onest
/-èst/
o|nest
[AF]
-
adi., s.m.
che, cui che al va daûr de justizie e de legalitât, che si compuarte cun coretece cun chei altris e che nol cîr di imbroiâju:
Signôr, jo ti ringrazii che no soi come chei altris oms disonescj, laris e bausârs; jo o soi just e onest (Riedo Pup, I furlans e i pecjâts);
che tu vadis, mari lenghe, / serie e sclete, intor intor: / tu confuarte dut chest popul / salt, onest, lavoradôr! (Bindo Chiurlo, Il cjant de Filologjiche Furlane)
Sin. just
, coret1
, dret
Cfr. bon
, brâf
-
adi.
di cui che al vent o che si impegne intun contrat, che nol cîr di vuadagnâ di plui di ce che al è just:
co tu sês là [a Triest], di tîr va a gjoldi il fresc / Sul ribat del librâr Carlo Tedesc. / Negoziant onest, / Ti tratarà cun dute cortesie (Pieri Çorut, Lu moli a slas)
Sin. just
-
di paie o compens, che al corispuint al valôr reâl di un ben o di un servizi:
si oblein chei che àn pline a fa cjareçs e traspuarts nei timps libars de campagne a un presi onest (Toni Broili, I trucs furlans. Ombre di lunari par l'an 1851)
-
di prodot, servizi, risultât di un lavôr e v.i., che al è di buine cualitât, che al vâl ce che al coste:
prin di cjapâ la rive par tornâ a cjase, o soi sbrissât dentri a bagnâ la peraule alì di Grumbule, che al à un got di chel onest (Josef Marchet, Lis predicjis dal muini)
-
s.m.
cuantitât, misure, paie e v.i. che e je in proporzion juste:
i ûl simpri contentâsi dal onest! (Alviero Negro, Lis çariesis pe mari di sant Pieri)
Sin. just
-
adi., s.m.
che, cui che si compuarte e al fevele cun sinceritât, scletece, clarece e v.i.:
la stampe di cumò no je ne plui oneste ne plui inteligjente di chê fassiste: e je nome dividude in diviarsis direzions (Josef Marchet, Il pietin e il grop)
Sin. sincîr
, sclet
-
di azion, ativitât, espression e v.i., che e corispuint ae veretât, ae realtât:
e sarès ore di doprâ un altri lengaç plui onest e plui persuasîf (Josef Marchet, Cumò che o savìn…)
-
adi.
di persone, soredut di femine, che e va daûr dai precets de moralitât, soredut inte vite sentimentâl e sessuâl:
une femine oneste, nome cjase e lavôr, voli e cûr nome pe famee (Alan Brusini, Come tai romançs);
puedio rassegnâmi, zovine come che o soi, a restà simpri sole, cuant che un om brâf e onest al mi ufrìs il so nom e il so ben! No aio plui il dirit jo di formâmi la mê famee […]? (Bruno Paolo Pellarini, Ninenane)
-
di azion, pinsîr e v.i., che nol vûl lâ cuintri de moralitât, che nol vûl sedusi o sim.:
i varan dite che lis mês intenzions e son simpri stadis onestis (Bruno Paolo Pellarini, Amôr in canoniche)
Proverbis:
- cui che no si contente dal onest al piert ancje il rest
- la cjase di une femine oneste e je come une glesie