Dizionari de Lenghe Furlane

just  just  [FO]

1. adi., s.m. che, cui che al opere daûr di criteris di imparzialitât, proporzionalitât, moralitât:  al passave par om just, ancje se il so cûr al taseve cuant che a fevelavin i bêçs (Maria Forte, La tiere di Lansing); baste che no mueri la semence dai savis e dai juscj (Antoni Beline, Sant Jacum, là che al finìs il mont)
   Sin. galantom , imparziâl , moderât , onest
   
   1. di alc, che al è fat daûr di chei criteris o che al è une lôr espression:  come che al à dit Pape Zuan Pauli II, nissune vuere e je juste (Riedo Pup, I furlans e la Vite Catoliche)
   2. tant che predicât e riferît a une obietive o a une subietive al pues vê prime la preposizion "di":  nol è di just che la tô cjase e sei di mancul di chê di to fradi e di to cusin (Maria Forte, Cjase di Dalban); al è di just di scoltâlu ancje lui (Alviero Negro, Int di masnade)
   3. s.m. concet e aplicazion dal complès di chei criteris:  une volte grancj, a benedivin ducj i lôr di cjase che ju vevin tirâts sù sul just (Riedo Pup, I furlans e i frutins)
2. adi. che al va daûr dal merit, de proporzion:  «Cuarante mil» «Folc! Si tignìn sù, eh?» «Us ai dit che e je stade une vore fadiose. Al è un presit just» (Carlo Sgorlon, Prime di sere)
   Sin. meretât , motivât
   
   1. ce che al è meretât:  o pensìn ancje che cui che al sa fâ il so mistîr si vedi di paiâlu il just (Marc Stolf, ‘Blecs’, ‘Tacons’ e altris supostis)
3. adi. che nol à erôrs:  scrivi just almancul il non (Dino Virgili, Emme come mamma); il risultât de operazion al è just
   Sin. esat , precîs , coret¹
4. adi. che al va ben o al è bon intune cierte situazion:  al jere la persone juste par fâmi strade tra la int di chest paîs (Alan Brusini, Gian Paolo Linda, I forescj); al è il moment just par un gnûf inizi (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
   Sin. adat , bon , fat² , perfet , adatât
   
   1. che al è in cundizion di fâ ben une cierte funzion o di produsi cierts efiets:  al è vignût il frêt just par che la aghe dal Riu si glaci dal dut (Marisa Moretti, Neveade)
   2. che al corispuint in maniere perfete a un concet, a un model, a ce che si vûl e v.i.:  al veve passade dute la buinore ator pal marcjât, fermantsi a cjalâ ogni banc di cocis, cirint la plui "juste" […]. «Vele!» al veve berghelât: di chel zâl "just", sglonfe e cun chês grispis su la scusse che a someavin fatis a pueste par fâ pôre (Christian Romanin, Taiant la coce)
5. adi., av. tal timp previodût, ni masse tart, ni masse adore:  a dispiet de nêf, o sin rivâts juscj a la cunvigne (Fausto Zof, Cors di lenghe furlane)
   Sin. in pont , puntuâl
6. adi. te cuantitât che e covente o che e corispuint a un cont za fat:  se al à i bêçs juscj miôr, che o ai pôcs minûts pal rest
   
   1. in numar, cuantitât, misure, durade precise, che si pues esprimi cuntune cifre interie:  un elicotar al sarès vignût a cjolilu aes dôs justis, tun prât a pene fûr de vile (Agnul di Spere, Un sorbet di limon)
   2. in cuantitât a pene suficiente:  no pues prestâti nuie, o soi cui bêçs juscj par fâ la compre e vonde
7. adi. intune situazion di normalitât, che no da problemis:  i valôrs dal sanc a son juscj, nol è nuie di preocupâsi
8. adi. che al à une misure che e va ben intun ciert spazi, ni masse grant, ni masse piçul:  no stâ a comprâ lis scarpis justis al frut, comprilis in cressi; fortune che l'armâr al passe just pe puarte, se di no si veve di dismontâlu
   
   1. che si svicine masse al spazi a disposizion o che al sta a pene masse tacât a alc altri:  il cuel de cjamese al è masse just, miôr une misure plui grande
9. adi. in buinis cundizions di salût fisiche, in buine forme:  «Siôr dotôr, mi somee che ancje lui nol sei just», i dîs la paziente che aromai e je pronte. «Cun chest timp, siôr dotôr, tocje stâ atents, vuardâsi des corentiis, dai sbalçs de clime. […]» (Meni Ucel, Tant parom)
   
   1. in buine salût mentâl:  no si jere sbaliade: Tilio nol jere just. E nol passà trop timp che al scomençà a bacilâ: nol durmive di gnot, al mangjave pôc e nuie, al fevelave di bessôl par oris a lunc (Pieri Menis, Il fi de Rosse)
10. av. in maniere precise, esate, cence erôrs:  dut al filave ben se un al saveve rispuindi just ma se si inçopedave in alc l'inzegnîr al leve in bestie (Franco Vigo, Unitâts des misuris)
    Sin. precîs , ben , pulît

Polirematichis e espressions idiomatichis

• a dîle juste loc.av.
• contâle juste loc.v.
• dîle juste loc.v.
• par dîle juste loc.av.

Proverbis:

• ancje il just si inçopede siet voltis in dì
• ce che al è just di fâ, bisugne fâlu e vonde, magari murî di fam
• di just no je nome la muart
• il just al puarte la pene dal pecjadôr