Dizionari de Lenghe Furlane

fat²  fat  [FO]

1. s.m. ce che al sucêt te realtât, che al risulte di une condote, di une azion o de casualitât:  intai ultins trente agns o vin viodût che la temperadure e je aumentade, un fat che al à permetût a la atmosfere di tignî plui vapôr (Cristina Minuzzo, Gotis di sience 1); si precise che ogni riferiment a fats reâi al è dal dut casuâl (Fabian Ros, L'om che al pierdeve pinsîrs pe strade); al ven il moment di cjatâsi di bessôl in face dai fats de vite (Gianni Gregoricchio, Trê feminis)
   Sin. acident , acjadiment , afâr , at , azion¹ , câs , circostance , vicende
   
   1. al pues jessi specificât di une proposizion:  il fat che une lenghe par lâ indevant e vedi di jessi fevelade in famee al è vêr: il fat che al basti e che no coventin lis leçs nol sta ni in cîl ni in tiere (Sandri Carrozzo, L'Antifurlan); chel che al dave fastidi ai acusadôrs di Cavedalis al jere il fat che lui nol fos deventât un martar de cause, come altris (Giovanni Pillinini, Zuan Batiste Cavedalis - Une vite esemplâr)
   2. robe concrete, in contrast cun ce che al è nome teoric o dome dit:  il cont, che di zovin al jere stât in dutis lis parts dal mont, nol fevelave mai dibant e al puartave fûr simpri fats e documents (Riedo Pup, Il compromesso); nol è mai masse tart… cu la sperance che dopo des peraulis a rivin ancje i fats (Marc Stolf, Buine Zornade internazionâl de lenghe mari!)
   3. robe sigure:  al diseve: «Al è un fat che voaltris», e al cjalave lis feminis, «no savês fâ cui fruts […]» (Meni Ucel, Tirâ sù fruts)
2. s.m. massime tal pl., cuistion, afâr, responsabilitât e v.i. che i tocjin a cdn. in persone:  chê sdrume grise che no si impace mai, che e à miôr di no pensâ, che e dîs che no son fats siei (Angelo Floramo, Cuintristorie dal Nûfcent 1920-1930); al picje i doi fanâi ros e si dispon a partî e a fâ il so fat che al è di frenâ pes rivis jù (Ivano Urli, Storie di Min)
   Sin. facende , robe , afâr
   
   1. robe privade e risiervade:  nissun rivave a disclaudâ peraulis sui lôr fats (Maria Forte, La aghe dal Ariul)
3. s.m. vicende storiche o in ogni câs calcolade impuartante:  pal 776 lis cronichis a regjistrin i ultins fats: Carli, visât dal pape, si môf bande la Italie, dai conzurâts nome Rotgaut e il duche di Trevîs so missêr a tegnin dûr tai lôr intindiments (Sandri Carrozzo, Rotgaut e la politiche furlane langobarde); chês gleseutis sul fâ de nestre, a vevin di jessi dutis pituradis cui fats de storie sacre o de vite di Crist (Josef Marchet, Lis predicjis dal muini)
   Sin. vicende
4. s.m. [TS] dir. ce che pe justizie al conte e al pues produsi efiets juridics
   
   1. dir.civ. câs che al determine la nassite, la modificazion o la estinzion di un rapuart juridic
   2. dir.pen. complès dai elements obietîfs di une reitât

Polirematichis e espressions idiomatichis

• al sta di fat che loc.coniun.
• cun di fat loc.coniun., loc.av., loc.inter.
• dât di fat loc.s.m.
• in fat di loc.prep.
• in fin dai fats loc.av.
• savê il fat so loc.v.
• sta di fat che loc.coniun.

Proverbis:

• a lâ daûr dai fats di chei altris, a van di mâl i siei
• a valin plui i fats che no lis cjacaris
• a valin plui i fats che no lis peraulis
• a vuelin fats a fâ umign
• bielis peraulis e cjatîfs fats a incjanin savis e mats
• contentâsi dal fat so e gjoldi plui che si po
• cu lis bielis peraulis e i bruts fats si ingjane savis e mats
• di un fat ind nas mil
• i grancj umign a fasin i grancj fats
• intant che si pense ai fats dai altris, si dismentee i siei
• l'om si cognòs cui fats e no cu lis cjacaris
• l'om si scuvierç cui fats e no cu lis cjacaris
• la onestât e sta tai fats
• la sience e spieghe i fats, la fede ju capìs
• lis peraulis a son des feminis, i fats a son dai umign
• lis peraulis a son feminis, i fats a son umign
• mancul peraulis e plui fats
• no bisugne impaçâsi dai fats dai altris che si à avonde di viodi dai siei
• ognidun che al pensi ai fats siei
• pal fat so, ognidun al è bon
• par fâ il fat so ognidun al è bon
• pocjis cjacaris e putrops fats
• tropons a son amîs a cjacaris e pôcs a fats