Dizionari de Lenghe Furlane

câs  câs  [FO]

1. s.m. fat che al sucêt cence jessi volût o spietât:  [Pauli] al è lât a urtâ daprûf di un camion […] o soi rivât sul puest un moment dopo che al jere sucedût il câs (Josef Marchet, Lis predicjis dal muini); mi fevelave dai câs de sô vite strussiade (Lucio Perès, Mê none Miute); al è un câs, o forsit ancje no, che la crisi e coli intal moment storic che al viôt mudâ la gjeografie e la politiche di mieç mont (Max Mauro, Un Friûl difarent: i 90 mhz di Onde Furlane)
   Sin. fatalitât , truc¹ , vicende , fat¹
2. s.m. fat straordenari o pôc usuâl:  [par lâ a sgliciâ] il suei difûr al jere un pôc masse lontan par nô, mularie dal borc disot; e po al jere un câs che al deventàs dut une lastre (Lucio Perès, Tal Cuar)
   
   1. fat stramp, curiôs:  "Âstu sintût dal ultin câs di Toni Mat?" "No, ce aial cumbinât cheste volte?"
      Sin. menade , svariade , camofe , capriç , creste , gjeromete , matade , matierie , svariament , tic² , tîr , tananai , truc¹ , meneuce , schiribiç , stoc¹ , strambade , strambot , striament
3. s.m. fat esemplâr di un ciert fenomen:  si pues vê iniment la Scola ladina de Fascia, che al è un câs di sucès là che, tal zîr di un pôcs di agns, si è rivâts a inserî la lenghe ladine come lenghe veicolâr (Mario Dutto, Scuelis di cualitât e lenghis di minorance. Une riflession su la lenghe furlane intes scuelis); in chei agns, e jere une gruesse novitât che un sagjist talian al fevelàs dal câs dal Friûl in tiermins di nazion improibide (Adrian Cescje, Memoriis di politiche linguistiche)
   
   1. argoment, pont specific intune suaze plui grande:  un altri câs che nol da masse problemis al è chel dal v che al ven prin dal sun w: vueli, vuardâ (Xavier Lamuela, La grafie furlane normalizade)
4. s.m. [CO, TS] med. event patologjic o clinic, situazion specifiche di un pazient che al à une cierte afezion:  il miedi al conseà di fâ vignî un altri miedi par une consulte: il câs al jere grâf: o salvâ la mari o salvâ il frut (Pieri Somede dai Marcs, A jerin lagrimis)
   
   1. pazient che al à une cierte patologjie:  ogni an a son miârs di câs di influence
5. s.m. fat che al pues jessi investigât, che al pues jessi criminâl:  ancje se il câs al jere stât metût in archivi sot la vôs "suicidi" lui nol jere convint e al seguitave a sgarfâ (Roberto Ongaro, Cretevierte)
6. s.m. acjadiment scjassôs, scandul, spec. in cjamp politic o judiziari:  il president al à vût di dâ lis dimissions par un câs di coruzion; cussì di bocje in bocje il câs di Matie Moràs [che al veve vût un amôr disfortunât cu la fie dal paron de fornâs] si sglonfà, si colorì, resentât ta la aghe dal poç, strupiât sot ducj i puartis (Pieri Menis, Sul agâr)
   Sin. acjadiment , fat¹ , storie
7. s.m. circostance, situazion particolâr:  te inrocade al è l'unic câs che il re si môf plui di une casele (Nilde Teresa Negro, Zuìn di scacs); la ocupazion neolitiche e interesse centenârs di etars (tal câs di Samardencje, i materiâi a son sparniçâts su cirche 600-800 etars di superficie) (Andrea Pessina, Gaetano Vinciguerra, La preistorie in Friûl); une cuistion che e va profondide cun cussience e cun scandais câs par câs (Buteghe dal Mont, Luche Nazzi, Guide par un consum just e solidâl)
   Sin. spieli , storie , vicende
   
   1. moment o ocasion che al sucêt alc:  al jere râr il câs che al cjatàs cualchi toc un pôc grues, stant che il bosc al jere stât za regolât dai puars dal paîs (Carlo Sgorlon, Prime di sere); se dopo la scuele no rive a risultâts concrets (cemût che al sucêt te plui part dai câs) [i gjenitôrs] no pretindin e no protestin (Sandri Carrozzo, La politiche pe lenghe furlane: risultâts de ultime aministrazion regjonâl in Friûl-VJ e propuestis pal avignî)
      Sin. volte
   2. moment o ocasion juscj par alc:  forsit al jere il câs di fevelâi a sô fie cul cûr in man, come se e fos grande (Carlo Sgorlon, Ombris tal infinît); in Venedonie no mi someave il câs di lâ parcè che o savevi che chel popul […] al podeve jessi pericolôs (Checo Tam, Sense)
8. s.m. ipotesi, pussibilitât:  se nol è rivât fin cumò, nol è câs che al vegni; metìn il câs che i tiei suspiets a sedin juscj, no bastin, a coventin provis
9. s.m. cause irazionâl fûr dal control uman o ancje cause no cognossude o mancjance di cause:  lassâ sielzi al câs; une part impuartante e je chê dal câs che al lavore su lis mutazions gjenetichis: cualchidune e à sucès, cualchidune no (Claudio Tuniz, Evoluzion umane: la sience e mostre i segrets des nestris origjins)
   Sin. fortune , destin , fatalitât , casualitât
10. s.m. [TS] ling. tes lenghis flessivis e aglutinantis, la forme che il non al cjape par esprimi une funzion sintatiche, o la funzion sintatiche stesse:  il latin classic al veve sîs câs: nominatîf, gjenitîf, datîf, acusatîf, ablatîf e vocatîf

Polirematichis e espressions idiomatichis

• a câs loc.av., loc.adi.inv., loc.coniun.
• câs contrari loc.coniun.
• câs diviers loc.coniun.
• dal câs loc.av., loc.coniun., loc.adi.inv.
• dal câs che loc.coniun.
• dâsi il câs loc.v.
• dut câs loc.coniun., loc.av.
• fâ câs loc.v.
• in câs loc.av., loc.coniun.
• in câs di loc.prep.
• in câs diviers loc.coniun.
• in dut câs loc.coniun., loc.av.
• intal câs di loc.prep.
• meti câs loc.v.
• meti il câs loc.v.
• par câs loc.av., loc.adi.inv., loc.coniun.
• se dal câs loc.av.
• se par câs loc.coniun., loc.av.
• se si intive il câs loc.av.
• tal câs di loc.prep.

Proverbis:

• di câs al câs
• i câs a son come i nâs: ducj si somein e no 'nd è nissun compagn
• ognidun che al proviodi ai câs siei