Dizionari de Lenghe Furlane

creste  /crè-/  cres|te  [AF]

1. s.f. formazion cjarnose rosse sul cjâf di diviersis bestiis, par esempli di gjai, gjalinis, poleçs, spec. dai masclis:  il gjal si fâs indevant cul bec a pene viert, cu la creste dreçade, cui barbaiocs ros slusints, cu lis plumis sglonfadis (Giovanni Battauz, Flavio Cossar, Renato Iacumin, I mosaics de basiliche di Aquilee)
   Sin. çuf
   
   1. çuf di plumis o di pêi che si puedin dreçâ sul cjâf o ancje su la schene di ciertis bestiis:  la creste dai pavons (Bepi Agostinis, Storie de art in Friûl)
      Sin. çuf
   2. (fig.) çuf di cjavei o petenadure che e ten i cjavei insù:  cjavei nus ai àn taiâts vie par in bande lassantnus la creste tal mieç (Max Mauro, Buchenwald 1944)
2. s.f. cualsisei forme o struture che e da insù insom di alc
   
   1. (fig., meton.) cjâf:  e cole la tempieste, / che cope un elefant / se i cjât pe creste (Pieri Çorut, I miei pronostics)
   2. (fig.) part alte, insom di alc:  il forment al plee la creste, / si madrès il nestri pan (Ercole Carletti, I dodis mês)
   3. sbrume insom di une onde:  crestis di sbrume blancje / lustrin les capis / sul savalon (Enzo Driussi, Dongje il mâr)
   4. [TS] anat. part infûr di un orghin, massime di vues
3. s.f. sorte di scufe blancje, doprade plui di dut des feminis di servizi:  no i someave nancje vêr che la camarele - grumâl blanc e creste inriçade - i domandàs ce che i plaseve di mangjâ (Maria Forte, Cjase di Dalban); "Oh, pre Jaroni!…" si disè a mieze vôs la camarele cul grimâl blanc e la creste (Dino Virgili, La aghe da pît la cleve)
4. s.f. profîl spiçât e lunc li che si zontin dôs cuestis di mont:  une ponte che si slançave de bande di soreli a mont cuntune creste di crets scûrs (Agnul di Spere, Int no consumade); di chê altre bande la murace des monts cu lis crestis imò blancjis di nêf (Dino Virgili, Friûl di Viarte)
   
   1. part plui alte di un rilêf:  finide la creste de culine, si scugnive passâ il bosc di Kebespok (Pieri Menis, Tal bosc di Kebespok)
5. s.f. (fig.) ande supierbeose:  scugnî tratâ cuntune raze di impleâts gnove cree e cun tante di creste, ma mancul pratiche e oneste di chê di prime (Francesc Placerean, Cuintristorie dal Friûl dal 1866 fint in dì di vuê); «E vignarà ben ancje la sô che e smetarà dute chê creste…» (Pieri Menis, Un muart su la strade)
   Sin. pretese
6. s.f. (fig.) desideri pretenziôs e irazionâl:  cjalaitlis chestis zovinis, / devotis e modestis, / che bandonant lis crestis / si donin al Signôr (Zaneto, Conversions pusticis)
   Sin. camofe , estri , fumane , gri , jevade di cjâf , mateç , matetât , menade , meneuce , morbin , passion , pice , sbisie , schiribiç , smanie , snaric , stoc¹ , tic² , tîr , uce , voie , capriç
7. s.f. cuantitât in soreplui:  e veve ancjemò su la gobe une creste di preson di sîs mês (Riedo Pup, La none in cuço e Cutolo assolt)

Polirematichis e espressions idiomatichis

• gjalut de biele creste loc.s.m.
• meti sù la creste loc.v.
• parussulin de creste loc.s.m.
• sbassâ la creste loc.v.