Dizionari de Lenghe Furlane

truc¹  truc  [AF]

1. s.m. azion o artifici, in câs ancje tecnic o mecanic, che al à chê di imbroiâ o iludi:  i Bertui a vevin fat chê grande sostance a fuarce di causis e di trapulis, cul puartâ vie la robe ae lôr parintât cun mil trucs e avocats tes divisions (Pieri Somede dai Marcs, Une butule verde); [il prestigjatôr] al fasè une rie di trucs che a lassarin la int cence flât (Carlo Sgorlon, Ombris tal infinît)
   Cfr. imbroi , ingjan
2. s.m. azion o cjatade furbe, che e permet di rivâ a une soluzion:  o podaressin acetâ cheste storie di vuerutis mâl comandadis, di insurezions mâl preparadis e ladis simpri strucjis, di trucs diplomatics, se nus vignìs presentade cu la sô vere muse (Josef Marchet, Cui nus liberaraial des liberazions?)
   Sin. cjatade , idee , pensade
3. s.m. motîf o fin, ancje pretestuôs, par fâ alc:  l'ufizialut al fo une dì in buteghe di passade cul truc di cjoli perlis (Emilio Nardini, La Signorine Mie); cul truc di sant Donât / o passarai di strade a Cividât, / che ancje là vuei fermâmi cuindis dîs, / par onôr al proverbi e ai vêrs amîs (Pieri Çorut, La sagre dei amîs)
   Sin. pretest , scuse
4. s.m. situazion pôc clare, ancje pôc oneste:  i gjornâi a jerin plens di robariis, di imbroieçs, di trucs, di sgrifignaments (Josef Marchet, Lis predicjis dal muini)
   Sin. cabule , imbroi , intric , rizîr , afâr , trafic
   
   1. situazion o relazion amorose calcolade no morâl o di pôc cont:  son di mode i romançs, / là che pal plui son misturâts cui sants / i trucs, i moroseçs, / e mil e mil sporcheçs (Pieri Çorut, La mode); e veve reson la mê parone di dîmi che chest al è un puest pai inamorâts… […] un puest di trucs (Pieri Somede dai Marcs, Butìnle in staiare)
      Sin. moroseç
5. s.m. azion, situazion, acjadiment o robe in sens une vore gjeneric:  "Signorina, la vol far un giro cun mi?" e jê no sa ce dî, ce fâ. Ducj si capìs, si voltin da bande di jê e stan a cjalâ el truc. Tine dovente rosse come une bore (Dolfo Zorzut, Se la prime mi cjoleve); «Vorès nome, passant, che tu provassis se chel vuerîr culà al è salt di zenoi.» «Se nol ûl altri, e si sta pôc a dâi la prove.» Jê, vie dilunc pal so viaç, e Gubian atent a spiâ il truc (Giovanni Gortani, Sot consei di vuere)
   Sin. fat¹ , robe , cjosse , afâr
6. s.m. opare leterarie o teatrâl cence pretese, fate dome par divertî o stupî:  "Il speziâr", truc intun at di Costantino Smaniotto (Costantino Smaniotto, Il speziâr)
   Cfr. fufigne
7. s.m. il sbeletâsi, il colorâsi la muse cun cosmetics, il so risultât e i prodots cosmetics che si doprin:  "[…] jo no soi ancjemò pronte. O vês di tignîlu intal tinel. Nol à di viodimi cussì malmetude, cence un fîl di truc…" (Carlo Sgorlon, Il dolfin)