Dizionari de Lenghe Furlane

afâr  a|fâr  [FO]

1. s.m. operazion comerciâl o finanziarie fate par vuadagnâ:  il trafic des droghis al è l'afâr plui profitevul che lis bandis mafiosis a vebin inventât in Italie e tal forest (Redazion il Diari, La sgrife de mafie su la economie dal Nord)
   
   1. oportunitât di vuadagnâ o di invistî ben:  o vin comprade la tignude dal Glemonat… cjamps e cjase… e je stade une buine ocasion… un afâr (Pieri Menis, Chei di Muraie)
      Sin. ocasion
2. s.m. robe di fâ, di distrigâ:  fâ alc di ben in chês pocjis oris de setemane che mi restavin libaris dai miei afârs (Pieri Somede dai Marcs, In teatro); l'avocat al disglagnave ducj i afârs de Siore (Alan Brusini, Come tai romançs)
   Sin. assum , cefâ , cjosse , dafâ , facende , impegn , incombence , lavôr , negozi , fat¹ , trafic
   
   1. ativitât, situazion, cundizion e v.i. che e pues jessi frontade ben di cdn.:  la comari, viodint che nol jere afâr par jê, e mandà a clamâ il miedi e il miedi al conseà di fâ vignî un altri miedi par une consulte (Pieri Somede dai Marcs, A jerin lagrimis)
   2. probleme di frontâ, di cjatâ une soluzion:  o soi vignût par un afâr une vore delicât, sedial par me che pal partît (Roberto Ongaro, Il muc); a induvinâ il bon timp e la ploie al è un afâr intrigât, ma i cambiaments des lunis si po induvinâju, cuntun calcul di nuie (Josef Marchet, Preambul rusin)
      Sin. cuistion
   3. aspiet, part di une cuistion:  o ai cjapadis informazions e o calcoli, sul afâr de spese, di rivâ par dongje (Josef Marchet, Lis predicjis dal muini)
      Sin. cantin , fat¹ , cont¹
   4. (coloc.) persone o situazion dificile di tratâ, di frontâ e v.i.:  lâ indenant alì cu lis bombis dal mortaio su la schene, e sbrissâ, e finî cu lis gjambis fra i jenfris dai lens fin al cavalot e la cassele des bombis che e rive sul cjâf, vincjecinc chilos, e po indreçâsi e inmò indenant, in sumis un afâr, eco (Alan Brusini, I ribei)
      Sin. afâr seri
3. s.m. ativitât, situazion, cuistion e v.i. che e rivuarde cdn. in maniere personâl, par responsabilitât o par riservatece, ancje in espression di rispueste secje:  soi stât dal implicât e al dîs che no son afârs siei e al mi à mandât dal segretari (Pieri Somede dai Marcs, La buteghe dal barbîr); il Talian al jere un framasson? Afâr sô (Maria Forte, La tiere di Lansing); Fatime lu viodeve a jentrâ di gnûf in cjase cu la muse ruane di rabie. "Ce sucedial? Âstu dismenteât alc?" i domandave. "Afârs miei!" (Carlo Sgorlon, Ombris tal infinît)
4. s.m. in sens une vore gjeneric, situazion, complès di fats:  in Friûl l'afâr nol jere par nuie clâr, ancje par vie che il stât talian, voie o no voie, al veve pierdude la vuere e la Jugoslavie di Tito le veve vinte (Francesc Placerean, Cuintristorie dal Friûl dal 1866 fint in dì di vuê)
5. s.m. (fam., ancje spres.) cjosse, robe concrete, che no si sa o no si vûl determinâ in maniere specifiche:  cualchidun al veve intaiât cul curtìs un afâr che no si capive ben, ma che al podeve stâi che si tratàs di une sesule e un martiel… (Pieri Menis, Il «comandatôr»)
   Sin. imprest¹ , robul¹ , tramai , truc¹ , cjossul , tananai , tananaie
   
   1. orghin sessuâl masculin:  al leve ator pes corsiis dal ospedâl crot, cuntune canotiere curte e l'afâr a pendolon (Cristina Noacco, Faliscjis)
      Sin. cjossul , bighe¹ , bigul , imprest¹ , caz , argagn , uciel , parussul , brucje¹ , cai , mani , britul , coni , cotâl , cuaiat , çoçul , çus , pandolat , parussulat , pisse , salsiç , cudumar , vêt , sivilot , polam , salam , luianie , muiûl , pive , tananai , sbrissul
6. s.m. [TS] polit. problematiche politiche o judiziarie complicade, che e prodûs un contrast impuartant o che e fâs scjas:  dopo un tire e mole che al costà la ocupazion de Boemie e de Moravie, sul afâr dal coridôr di Danziche e sclopà la vuere (Francesc Placerean, Cuintristorie dal Friûl dal 1866 fint in dì di vuê)
   Sin. câs

Polirematichis e espressions idiomatichis

• afâr seri loc.s.m.
• biel afâr loc.s.m.
• brut afâr loc.s.m.
• fâ un afâr loc.v.
• jessi afâr loc.v.
• tal afâr di loc.prep.

Proverbis:

• i afârs in grant a son simpri contrastâts