Dizionari de Lenghe Furlane

sivilot  /-òt/  si|vi|lot  [CO, TS]

1. s.m. mus. strument a flât une vore sempliç, fat di une cjane di len, o in câs di vues o di altri materiâl, cuntun ciert numar di busis che a permetin di variâ lis notis:  ti rispuindin sivilots e lirons e viulins (Celso Macôr, Taramot)
   Var. siulot , sibulot
   
   1. strument de stesse sorte, cence pussibilitât di variâ lis notis:  cul sivilot di scusse, / sence bisugn di notis, / compagnarai vilotis / al pâr di ogni pastôr (Pieri Çorut, La gnot di Avrîl)
2. s.m. imprest pal solit di crep, che si pues ancje jemplâ di aghe e che si sofle par imitâ la vôs dai uciei
   Cfr. vuit
3. s.m. imprest de stesse sorte dal strument musicâl, doprât par dâ segnâi acustics:  al jere il puestin, puar diaul, cul cjapiel cu la visiere, il baston, la borse e il sivilot (Alan Brusini, Amîs come prime)
   
   1. aparât acustic cul stes funzionament che no si sune a bocje, ma cul passâ di aiar o vapôr:  un machinist al vignì infûr de barconete a cjalâ e al sbatacolà il braç, po al tirà la cuardute dal sivilot e al molà une lungje sivilade par trê voltis (Dino Virgili, La aghe da pît la cleve)
4. s.m. [TS] agr. forme di incalmâ li che fâs un tai diagonâl e un piçul sclap in maniere speculâr sedi tal pît che tal incalm:  si insedin i pomârs a sclap o a corone. Si incalmin fiârs a sivilot (Redazion SFF, Il Strolic furlan pal 1951)
5. s.m. [CO, TS] gastr. formât di paste secje fat in forme di cilindri vueit:  Delaide i veve preparât dutis pitancis ae furlane vie: sivilots cul salam, luianie cul vin blanc, verzis cu lis cuestis, frico di patatis, par sierâ cu la tipiche gubane (Roberto Meroi, Pistums)
6. s.m. (fig.) orghin sessuâl masculin:  "Oi me, Jacuma mê, che i mi disfâs, / oi me, ve che al mi gota il sivilot" (Eusebi Stele, I eri un dì cu la ligna a piâ 'sâfs)
   Sin. bigul , caz , afâr , argagn , uciel , parussul , brucje¹ , cai , mani , britul , coni , cotâl , cuaiat , çoçul , çus , pandolat , parussulat , pisse , salsiç , bighe¹ , cudumar , vêt , rusignûl , polam , salam , luianie , muiûl , pive , tananai , cjossul , imprest¹ , sbrissul
7. s.m. ornit.com. uciel passeriformi de famee dai Fringjilidis, cun cjâf, bec e barbuç neris, pet e panze ros, schene grise e alis neris cuntune striche blancje, cun colôr mancul vîfs tai esemplârs feminins, lat. sient. Pyrrhula pyrrhula:  gno barbe al veve di dut, vuitis, dordinis, smearts, dordeis, cirants, sverzui, luiars, faganei, montans, frisots, gardelins, sivilots (Zuan Codut, Uciei e ucielârs); o sintivi il mierli, il rusignûl, il luri e lontan il cuc, e cualchi volte il cuaiat e il sivilot (Lisdero Valle, La musiche dal bosc dal Cuar)

Polirematichis e espressions idiomatichis

• come un sivilot loc.av.

Proverbis:

• cuant che a vegnin i sivilots a finissin i uciei