Dizionari de Lenghe Furlane

uciel  /-èl/  u|ciel  [FO]

1. s.m. animâl vertebrât caraterizât, te plui part des speciis, de presince di bec, alis e plumis e de capacitât di svolâ:  i uciei in amôr a zornavin tra il vert, e il lôr cjant al jemplave il cûr e il mont (Pieri Menis, Zilugne); ogni tant a passavin scjaps di uciei di pas che a partivin a cirî il cjalt (Carlo Sgorlon, Prime di sere); "Cjalait i uciei dal aiar che a cjatin il lôr dibisugn cence semenâ…" al diseve pre Domeni (Maria Forte, Il vivi al è chel rangjâsi)
   Var. ucel
   Cfr. uciele
   
   1. chel animâl tant che paisse di cjaçadôrs e oseladôrs e tant robe di mangjâ, massime in riferiment aes speciis salvadiis avonde piçulis:  a volaressin abolî la cjace. Parcè? Par salvâ fasans, jeurs e cualchi uciel (Riedo Pup, I furlans e la cjace); i plasevin tant i uciei sul spêt (Alan Brusini, Al Macalè)
   2. spec. tal pl., ancje cun iniz. maiusc., chei animâi tant che classe zoologjiche:  lis plumis dai uciei tal principi si son evoludis sicu mieç di termoregolazion dal cuarp (Angelo Vianello, La evoluzion su la tiere. Une storie di competizion e cooperazion); no si sa ancjemò ce che a coventin i insiums - une fase che si le cjate dome intai mamifars e un pôc intai uciei (Franc Fari, Il cjâf dai furlans)
2. s.m. (pop.) orghin sessuâl masculin:  vela la 'sent che a ven a lecâti il cûl, a venditi la fia e la mari, a supâti l'ussel, parsè che tu ti sôs il cjapitani, il paron, il mafious, chel che al pos copâju o salvâju (Stiefin Morat, Donald dal Tiliment)
   Sin. bigul , caz , afâr , argagn , bighe¹ , parussul , brucje , cai , mani , britul , coni , cotâl , cuaiat , çoçul , çus , pandolat , parussulat , pisse , salsiç , sivilot
3. s.m. [BF] ognidune des parts dal sgjarui di une cocule che a dan infûr

Proverbis:

• a tindi masse archetis, a cjapin sù i uciei chei altris
• al è un trist uciel chel che nol puarte cun se la plume
• al vâl plui un uciel in man che no cent par aiar
• che e ledi la plume pûr che al resti l'uciel
• cuant che a passin i codons, i uciei a finissin
• cuant che a vegnin i sivilots a finissin i uciei
• cuant che l'uciel al è fûr de scjaipule, si stente a cjapâlu
• cui che al vûl cjapâ ducj i uciei che a passin no 'nt cjape nissun
• cui sglavaçs no si cjape uciei
• de plume si cognòs l'uciel
• domenie di ulîf ogni uciel al fâs il nît
• i uciei a son bogns chei dal bec zentîl
• il vuarp al brame la lûs, l'uciel la libertât
• l'uciel al puarte e al ven puartât
• l'uciel al va di çope in çope tant che il sossedâ di bocje in bocje
• l'uciel in man al frut, la surîs in bocje al gjat, lis disgraciis in man al avocat
• lâ indenant dì par dì tant che i uciei
• la nêf i uciei no le àn mangjade
• miôr pierdi la plume che no l'uciel
• miôr uciel di bosc che no di scjaipule
• miôr un uciel in man che no dîs sul arbul
• no si à di sierâ la chebe co l'uciel al è scjampât
• ogni uciel al cîr il so nît
• ogni uciel nol cognòs il gran
• par ogni uciel il so nît al è biel
• puar chel uciel che nol cognòs il gran
• se nol è spavent no si cjape uciei
• uciel che no si puarte la plume daûr, nol è uciel
• uciel pal aiar al cjante di ligrie, uciel in scjaipule al cjante di passion