Dizionari de Lenghe Furlane

argagn  /-àgn/  ar|gagn  [CO, FO, TS]

1. s.m. ogjet che al covente par fâ un ciert lavôr:  nissun louc da la vila al incantesemava come la favria di Cupa che a è inmò cun ducj i argagns in ordin (Novella Cantarutti, Cocali)
   Sin. imprest¹ , strument
2. s.m. [CO, TS] tecn. furniment par tacâ un nemâl devant dal tamon dal cjar:  puare zovine, sal jere seât di bessole [il fen] e cumò e jere daûr a menâsal a cjase cun chê uniche vacjute tacade cul argagn (Roberto Ongaro, Il muc)
   Sin. zovel
3. s.m. [TS] pescj. sorte di rêt par pescjâ
4. s.m. (fam.) robe in sens gjenerâl:  o vevi fabricâts argagns di ogni fate (Carlo Sgorlon, Il dolfin)
   Sin. imprest¹ , robul , tramai , truc¹ , cjossul , cjosse , robe , afâr
5. s.m. robe fate di mecanisims complès:  a Toni i sarès plasût smontâ dut l'argagn [un videozûc] par cirî di capî dulà che a jerin i trucs (Checo Tam, Lis pinessis); i fasè viodi un dissen, un argagn par tirâ frecis [une balestre] (Carlo Sgorlon, Prime di sere)
   Sin. aparât , dispositîf , mecanisim , ordegn , tramai , striament
   
   1. element tecnic di un alc di complès:  un craçolâ di feraze mote, un criçâ di vîts sbroiadis, un vuicâ, un crustâ di muiûi e ruedis sidiadis, un ciulâ di argagns che a movevin il martiel des oris (Maria Forte, La rive di Sant Pieri)
6. s.m. (fam., spres.) robe o imprest o veicul che al funzione mâl o che al è dificil di fâ funzionâ:  il prin ciclist dal paîs al è stât Zili fari che, tal 1890, si jere fat di bessôl un argagn dut di fier, ancje lis ruedis che al varà pesât sul cuintâl (Alan Brusini, Amîs come prime); argagns scuintiâts che si rompevin ogni moment (Gianni Gregoricchio, Trê feminis)
   Sin. biroç , carabere , cjossul , grabatul , imprest¹ , strafaniç , trabacul , tramai , striament , catan , scarabere
   
   1. [BF] persone pôc di sest:  e je simpri che si barufe cun chel argagn di om che e à
      Sin. cancar¹ , clostri , toc di coni , tramai , afâr , afâr seri
7. s.m. part dal cuarp cuntune cierte funzion:  lis crisis psicomotoriis a influissin sul cerviel, l'argagn de cognizion, de afetivitât e dal lengaç (Franc Fari, Il cjâf dai furlans)
   Sin. orghin , aparât
   
   1. (ancje scherç.) orghin sessuâl masculin
      Sin. afâr , bighe¹ , bigul , cjossul
8. s.m. (fig.) element, soredut struturât in maniere complesse, che al à une cierte funzion:  chei che a lavorin tai uficis, tes scuelis e tai argagns dal stât. (Francesc Placerean, Cuintristorie dal Friûl dal 1866 fint in dì di vuê); un argagn burocratic destinât a distribuî jutoris aes associazions (Adrian Cescje, Memoriis di politiche linguistiche)
   Sin. orghin , aparât , imprest¹ , atrument

Proverbis:

• cui che al mangje il vuadagn che al tiri l'argagn
• cui che al tire il vuadagn al tire ancje l'argagn
• no si discor che la vacje no tiri ma al è rot l'argagn