Dizionari de Lenghe Furlane

tramai  /-ài/  tra|mai  [AF]

1. s.m. argagn doprât par cjapâ bestiis, in gjenar in riferiment a une struture li che la bestie e jentre e no rive plui a vignî fûr:  "Sâstu femine, vin di cjapâ la bolp usgnot." E li al prepare el tramai. Capite la gnot; e ven la bolp jê, a viôt el pulinâr viart e contente a ti va drenti. Ma… taf! tal tramai… (Dolfo Zorzut, La ingratitudin dal on); "O ai tindût el tramai, el palisson pal martar…" (Costantino Smaniotto, El palisson dal martar)
   Cfr. trapule , palisse , palisson
2. s.m. (fig.) imbroi o situazion negative di li che al è dificil vignî fûr:  nol è che Cavedalis nol si inacuarzès di ducj i messedaments de politiche o che nol fos atent di no fâsi imberdeâ tai laçs des corints e dai moviments; al è che par no colâ tal tramai di chei zûcs e di chei trucs al pensave di no vê altri imprest che lis fuarcis armadis (Giovanni Pillinini, Zuan Batiste Cavedalis - Une vite esemplâr)
   Sin. palisse , palisson , trapule , vuate , rêt , scjaipule
3. s.m. (fig.) situazion complicade o che e fâs pierdi timp:  o ai vût tancj tramais che no ai podût vignî prime di cumò (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. imbroi , fastidi , intric , rogne , cuistion
4. s.m. (fig.) imprest o robe in gjenerâl, soredut se e je vecje, se no je in buinis cundizions, se no fâs ben la sô funzion, se e je plui che altri un fastidi, se e je di pôc valôr e v.i.:  une stanzie plene di scaraberis e di tramais, che une volte e servive di buteghe (Pieri Somede dai Marcs, Cun pocje spese…); di frut o viodevi a vignî a cjase mê feminis cu la cosse o il cjaruç plen di tramais di len di cusine, cjaçutis, taulîrs, scudielis, salarins (Luigi Ciceri, Cjantons dal Friûl)
   Sin. crassigne , intric , scrassigne , catan , trabacul , intrigatori , cjossul , robul , strafaniç , afâr , grabat , grabatul , naine , strieç , tananai , scarabere , carabere
   
   1. ancje in riferiment a persone, in gjenar mâl in sest o pôc buine di fâ une cierte funzion o che e da fastidi o che si calcole in cualchi maniere in mût negatîf:  gno zinar al è un tramai di cristian, saio jo se plui stupit o plui carogne… (Josef Marchet, Lis predicjis dal muini); cun dutis lis feminis che a jerin in France, propit chel tramai alì al veve di lâ a sielzi? (Franca Mainardis, Il sium di Lissandri)
      Sin. cancar¹ , clostri , ostie , osti