Dizionari de Lenghe Furlane

cuistion  /-òn/  cuis|ti|on  [FO]

1. s.f. il jessi un cuintri di un altri par diference di opinions, interès e v.i.:  dopo setemanis di cuistions, che al mancjave nome che si metessin lis mans intor, a son rivâts a metisi dacordo (Pieri Menis, Il testament); Tilde e ste cuntune sô agne di Rivis Darcjan, vedrane, sûr di so pari. Ancje cheste cuntun caratar di spins e in fote cuintri dal fradi par vie di cuistions di ereditât (Gianni Gregoricchio, Trê feminis); se al veve simpri tasût al jere dome par odi aes cuistions… che a fruin simpri (Maria Forte, Mabile la Lunghine); chel vuarp cu za cjantà cun grêc latin / dei crots e des surîs la cuistion (Nicolò Morlupin, Chel vuarp cu za cjantà cun grêc latin)
   Sin. litighe , radi , lote¹ , lît² , barufe , beghe , cantin , contrast , dadî , discussion , dispute , scuintri , tarlec , vertence , dissidie , tiche , criche
   Var. cuestion , custion , costion
   
   1. contese legâl, cause in tribunâl:  e si à fat cuatri riis di convenzion, / che par man di nodâr je stade scrite, / dut par cjoli il rimpin di ogni cuestion (Pieri Çorut, Pronostic del 1836); dopo un an di cuistions e di peteçs, dopo di vê spindût e spandût in avocats e perîts, dopo di vêsi fats imbroiâ di sensârs, capoborcs e mangjecjartis, finalmentri i erêts, par dividi cuatri cjamps e un segnâl di cjase mieze dirocade, a son vignûts ca di me par firmâ il contrat di division (Pieri Somede dai Marcs, Par la firme di un contrat)
2. s.f. [TS] dir. dubi di fat o di dirit che si met denant prin di scomençâ o intant di un procès:  la difese e à tirât fûr une cuistion di competence dal tribunâl
3. s.f. argoment, materie che e domande un esam, une tratazion:  i membris de comission a àn dirit di iniziative su ogni cuistion di competence dal consei (Aministrazion Publiche, Statût dal Comun di Udin)
   Sin. afâr , câs , cuesît , facende , materie , pont , probleme , sogjet , tematiche , teme² , robe
   
   1. robe che e à un pês in ce che si dîs, che si è daûr a fevelâ:  la cuistion e je une sole, che sês un trop di pioris, cence medole (Pieri Somede dai Marcs, Un pugn di moscjis)
4. s.f. element, tiermin che al à a ce fâ, che al è intune cierte relazion cun alc altri:  la «patrie» e je une cuistion di cûr e no di cerviel, di fede e no di reson: se si tire in bal il cerviel, al va dut in grum (Josef Marchet, La man e la arme)
   Sin. afâr , câs , facende , materie , pont , probleme , alc , fat¹ , teme² , robe , storie
5. s.f. probleme di interès storic, politic, sociâl o culturâl une vore dibatût:  i doi poemis a son diferents ancje par ciertis carateristichis di stîl e di lenghe, tant che e je nassude, za in ete antighe, la famose cuistion omeriche (Sandri Carrozzo, Pierluigi Visintin, Jentrade de Odissee); la cuistion de lenghe no jere une bataie di pôcs fanatics, ma un fat sintût di tante int (Max Mauro, Un Friûl difarent: i 90 mhz di Onde Furlane)
   Sin. câs , afâr , probleme , problematiche

Polirematichis e espressions idiomatichis

• fâ cuistions loc.v.
• plantâ cuistion loc.v.