Dizionari de Lenghe Furlane

alc  alc  [FO]

1. pron.indef. cualchi robe:  metiti cun lôr che jo tun lamp o parecji alc di meti sot i dincj (Tarcisio Venuti, La cjase di Toni); là vie al jere un grant davoi, ducj voleve savê alc, ducj voleve fâ alc (Agnul di Spere, Messe di misdì a Varsavie)
   Sin. cualchi cjosse , cualchi robe
   
   1. un pôc, une cierte cuantitât, ancje di alc di imateriâl:  e jere tornade cu la muse legre. E puartave alc di bêçs pe mame (Maria Forte, Cjase di Dalban); e jere vistude di neri… po e je sparide di colp. Voie o no, alc di pôre… (Dino Virgili, La Çucule)
      Sin. un alc , un pôc , cualchi alc
   2. cun dopo un complement partitîf:  Pieri une dì rivant tal curtîl di Jacum si visà subit che al veve di jessi alc di gnûf in cjase (Pieri Menis, Sul agâr); che mi conti alc di biel, Fiorine… (Dino Virgili, La aghe da pît la cleve); al ordenà alc di cjalt e la chelare i fasè bocje da ridi (Maria Forte, La tiere di Lansing)
   3. robe negative, segrete, situazion no ben cognossude che e fâs jessi in pinsîr:  e pûr chel frut al à di vê alc (Dino Virgili, Dôs feminis e un frut)
   4. malatie no ben definide, in gjenar in riferiment a une disfredade o a une polmonite o altri mâl che si capìs dal contest:  pre Stiefin al à di vê cjapade une ponte e al è tal jet. E je bielzà la seconde volte che al cjape alc chest an (Josef Marchet, Lis predicjis dal muini)
   5. in frasis negativis, nissune robe:  al fo dut un bisibili te famee reâl ma nissun nol podè rigjavâ alc (Andreina Nicoloso Ciceri, Maletegne - Racconti popolari friulani I)
      Sin. nuie
2. pron.indef. informazion o dât o nozion no complete:  e capità Taresie Tos, e po la Menie Gri e altris a domandâ se chês robis a jerin veris… […] A vevin sintût alc ancje lôr, ator pal borc (Maria Forte, Cjase di Dalban); cumò Nando, ancje se nol diseve nuie, al jere sigûr che Ghine e savès alc (Pieri Menis, Il testament)
3. s.m. dome sing., robe, aspiet, detai:  tal neri di chei voi, dopo chê clamade dal priôr, si viodeve alc di strani, alc di gnûf, alc di dolorôs… (Zuan Lurinçon, La Madalene); dopo [di vê bevût], la sô filusumie e cjapave alc di salvadi (Maria Forte, Il bal spisimât des ombrenis)
4. pron. detai, particolâr che si somee:  jo o pensi di vê cjapât alc di nono F. (Checo Tam, Sic transit gloria mundi)
5. av. intune cierte misure, intune cierte maniere:  pal moment, sbeletìnsi, petenìnsi, tirìnsi mai alc sù di suste (Ivano Urli, Storie di Vera); tant che jarbis maris / (sinç e rude… e alc di dolcemare) (Maria Forte, Biât Vino)
   Sin. un pôc , un tic , un fregul , un alc

Polirematichis e espressions idiomatichis

• alc e ce loc.s.m., loc.adi.inv.

Proverbis:

• alc al è alc
• alc al è alc e nuie al è nuie
• alc al è ancje tal aur
• alc al è e alc e nuie al è nuie
• alc al va in ogni negozi
• cui che al lavore al à alc e cui che nol lavore nol à nuie
• denant di maridâsi al pâr che al mancji alc, daspò al mancje dut
• di un avâr tu puedis sperâ alc, di un lôf no stâ sperâ nuie
• dulà che al fume alc si bruse
• fruts e colomps a puartin dongje simpri alc
• i fruts no disin: pari biel, mari biele; ma: dami alc in te scudiele
• ingrume vuê, ingrume doman, si cjate alc insom dal an
• miôr alc che no nuie
• ogni pôc al è alc
• se nol plûf alc al ven fûr