Dizionari de Lenghe Furlane

un tic    [FO]

1. loc.pron. un ciert numar, une cierte cuantitât indefinide o moderade, sedi di elements o entitâts che a son dits a clâr, sedi che si capissin dal contest:  "Bêf chest brulè; i ai metût dentri un tic di canele e un biel pôc di zucar, ti smolarà la tos" (Pieri Somede dai Marcs, Un pugn di moscjis); si inacuarzè che te sô farie al jere restât un tic di materiâl (Josef Cjargnel, Il Friûl al è nassût cussì)
   Sin. un pôc
2. loc.av. in misure, cuantitât, intensitât e v.i. indefinide o moderade o bondante:  bon e brâf, grant predicjadôr; nome che al fevelave un pôc masse gramaticâl e che al tirave un tic masse a siôr (Riedo Pup, Predis di ogni fate); «O varès di cuinçâ lis vîts. O ai viodût che in cualchi puest a àn za scomençât». «Al è un tic adore, ma si po fâ» (Carlo Sgorlon, Prime di sere); i disè che par furlan Furlanie e Friûl a son dôs robis un tic diferentis, ma che par sloven si à dome un non, Furlanija (Agnul di Spere, In viaç di domenie)
   Sin. un pôc , pitost , pluitost , alc
3. loc.pron., loc.av. ancje par formâ costruzions corelativis o distributivis:  un tic al svoletave e un tic si faseve strade jenfri lis cisis (Josef Cjargnel, Madone di Mont)
   Sin. alc , ce¹ , un pôc

Components:

• tic¹ fonosimb., s.m.