Dizionari de Lenghe Furlane

pluitost  /-ò-/  plui|tost  [FO]

1. av. par formâ o rinfuarçâ une aversative, une oposizion, une alternative:  al rive adore a fâsi capî che lui nol è un galiot, pluitost al è puar, chel sì, di famee nol à nuie, di famee al è un dai plui puars di Sante Marie (Ivano Urli, Storie di Vera); la migrazion no je mai fughe, pluitost ricercje di alc che al permetarà di tornâ (Angelo Floramo, Cuintristorie dal Nûfcent 1910-1920); Lait a cjase che culì no vês nuie ce fâ… Disêt pluitost un recuie (Pieri Menis, Un muart su la strade)
   Sin. invezit , anzit , ben
   Var. pitost
   
   1. par pandi une precisazion, par jentrâ plui insot intun discors:  te mê vite, o cjatarai simpri i miei familiârs pronts a dâmi une man. Pluitost il probleme plui grant al è chel di induvinâ la strade juste, ancje parcè che mi pâr di vê capît che la strade plui juste e je la plui dificile di fâ (AAVV, Sul florî)
   2. par introdusi un discors gnûf:  … ce âstu di politicâ!… Turo! Disimi, pluitost: cemût la frutate in Cleve? (Dino Virgili, La aghe da pît la cleve); "Lassìn cori, Titute, lassìn cori!… Pluitost, se no i displâs, i conti come che une volte i venezians a celebravin la fieste de Sense […]" (Arturo Feruglio, Viaç a Vignesie)
2. av. par formâ costruzions comparativis di maiorance:  a è simpri li, pluitost piês che miei, e stente a stâ sù in senton, i mancje simpri il flât, puare mame (Pieri Somede dai Marcs, Vilie di Nadâl (teatri))
   Sin. plui
   
   1. plui vulintîr:  "Gelindo no, pluitost il convent e ce che o ai dit, o manten […] (Costantino Smaniotto, Co l'amôr al cimie); "Là sù di to pari no! e sarès une vergogne!… Pluitost lâ par dut il mont. Se lôr a son Batistons, o soi ancje jo Lanzine!" (Dino Virgili, La aghe da pît la cleve)
      Sin. prime¹ , prin
3. av. intune cierte misure, cuantitât, maniere:  la problematiche frontade di cheste ricercje si presentave pluitost dificile e delicade (Linda Picco, Ricercje su la condizion sociolenghistiche dal furlan); no, no tu âs la fiere; anzit tu sês pluitost frêt (Amedeo Giacomini, Tal ospedâl)
   Sin. avonde , plui o mancul

Polirematichis e espressions idiomatichis

• pluitost che loc.coniun.