Dizionari de Lenghe Furlane

storie  /-ò-/  sto|ri|e  [FO]

1. s.f. il sucedi dai fats dai popui inte lôr evoluzion dilunc dal timp:  lis diferencis di temperament e di culture e di vite, tra une regjon e chê altre e jerin masse grandis; parcè che la storie di une regjon e je stade divierse di chê di une altre (Josef Marchet, Lenghe e lenghis in Italie); te storie umane o vin ancje esemplis di popui che a àn savût resisti ae pierdite de lôr identitât e ancje po riscatâsi (Adrian Cescje, Memoriis di politiche linguistiche)
2. s.f. narazion, studi e interpretazion critiche dai fats dai popui:  ogni volte che la buere politiche e mude direzion, a scuegnin mudâle ancje i libris di storie (Josef Marchet, Cuintristorie dal Friûl fin sot la Italie)
   Sin. storiografie
   
   1. dissipline, materie di scuele o cors di lauree li che si insegnin chei fats:  i tornavin tal cjâf tant che intun sium lis lezions di storie de sô prime zoventût (Roberto Ongaro, Il muc)
3. s.f. ricostruzion, esposizion e interpretazion dal davuelzisi di un ciert aspiet de vite sociâl e culturâl:  une rubriche setemanâl su la storie de art furlane (Erika Adami, O ai scrit pal gno popul)
   
   1. opare cun chê ricostruzion, esposizion e interpretazion:  tal 1968 e comparì une storie de leterature furlane a pontadis di Brun Damian (Adrian Cescje, Memoriis di politiche linguistiche)
4. s.f. fat vêr za sucedût che si pues documentâlu:  il messedament etnic e linguistic sot dai langobarts e je storie sigure (Sandri Carrozzo, Rotgaut e la politiche furlane langobarde)
   Sin. fat di veretât , fat¹
5. s.f. secuence di fats ancje di interès dome personâl, no coletîf:  o ai copât doi umign che mi vevin ofindût. Ma ancje jo ju vevi ofindûts. E je une storie complicade, Ricardo, al è dificil che tu puedis capîle (Carlo Sgorlon, Prime di sere); Nurine mi à contât la sô storie e jo cumò te conti a ti. Scoltimi ben e ten a ments ce che o ti dîs (Cristina Noacco, Faliscjis)
   
   1. sucession di fats che a formin la tele di un romanç, di une opare teatrâl, di une pelicule cinematografiche:  mi à sucedût di vê let, timpon indaûr, un at unic di O' Neil. No mi visi il titul. E jere la storie di doi spôs sui sessante (Gianni Gregoricchio, Trê feminis)
6. s.f. fat, facende, situazion:  a è une storie che a va masse par lis lungjis (Pieri Somede dai Marcs, Un pugn di moscjis); i parons a fasin dome bêçs su lis spalis di chei che a lavorin: dibisugne che cheste storie e finissi, o cu lis buinis o cu lis tristis (Tarcisio Venuti, La cjase di Toni)
   Sin. afâr , câs , circostance , cuistion , facende , fat¹ , musiche , robe , situazion , naine
7. s.f. situazion problematiche:  di Sandri invezit no ai savût nuie. Ma a Parigji, dulà che al è, nol varès di vê storiis (Pieri Menis, Sul agâr)
   Sin. cuistion , fastidi , probleme , casin , berdei , naine , intric , rogne
8. s.f. narazion di fats reâi o di fantasie, tradizionâl o di autôr, cun fin artistic o ancje dome di svariament:  o jeri usât a lei storiis dulà che il protagonist al jere protet di une sorte di corace dal destin (Carlo Sgorlon, Il dolfin); ducj chei che leevin chês storiis [di Catarine Percude] a si maraveavin (Ugo Pellis, Catinuta)
   Sin. flabe ipon. , liende ipon. , conte ipon.
   
   1. narazion de tradizion popolâr:  al contave lis storiis dal Signôr cun Sant Pieri ator pe Furlanie (Dino Virgili, La aghe da pît la cleve)
9. s.f. robe che no je vere:  "No son storiis, è vere sì […]" (Pieri Somede dai Marcs, Cjase di fitâ)
   Sin. bale , bufule , falsetât , fote , invenzion , luianie , menade , stoc¹ , storiele , sflocje , bausie¹ , flabe , naine , sbarade , sflandocje , sflandogne , trombonade
10. s.f. relazion di amôr:  la sô zoventût, a pene vignût fûr de Academie militâr, e jere tiessude di galantariis e storiis cun sioris de buine societât (Carlo Sgorlon, Il dolfin)
    Sin. amôr , aventure , caravane , relazion , moroseç

Polirematichis e espressions idiomatichis

• fâ storiis loc.v.
• fâ tantis storiis loc.v.