Dizionari de Lenghe Furlane

fastidi  /-tì-/  fas|ti|di  [FO]

1. s.m. sensazion di contrarietât rispiet a alc o a cdn.:  "Sintiti, sintiti e disimi ce che ti ocor! Mangjâ? Bevi? Polsâti? Ti daial fastidi il balcon viart? Aio di lâ a siarâlu?" (Bruno Paolo Pellarini, Amôr in canoniche); i vistîts a tacavin te schene, a fasevin fastidi (Dino Virgili, La aghe da pît la cleve)
   Sin. riviel
   Var. fastili
2. s.m. fat negatîf che al da displasê, soredut no spietât o che no si pues evitâ:  il fi […] cercjava una ocasion o un pretest di finî chel travai, chê fadia, chel fastidi [un lavôr dûr par pescjâ] (Federigo Comelli, Il me paîs); no sai ancjemò se al sarà par me un fastidi o un plasê (Pieri Menis, Sul agâr); une volte finît il fastidi de naie e la condane de vuere, a tornin a cjase (Riedo Pup, Soldât jo mame!)
   Sin. inciert , inconvenient , intop , dificoltât , probleme
   
   1. malstâ fisic, probleme di salût:  malâts cun intor mil fastidis (Pieri Somede dai Marcs, Sant Simon: 28 di Otubar 1917); se a une persone i ven un acident tal emisferi diestri dal cerviel, i ven une emiparesi te bande çampe dal cuarp e, cualchi volte altris fastidis, ma il malât al va indenant di istès a capî i discors e a fevelâ (Franc Fari, Il cjâf dai furlans)
3. s.m. idee, sensazion, cundizion psicologjiche di tension pe pôre che al puedi sucedi alc di negatîf:  [il balon al] svarie la int, le stravie dai problemis, le libere dai fastidis e i ten concentrât il cjâf nome su lis pidadis (Riedo Pup, Balon: crodi, ubidî e paiâ); o ai la impression di vêi dât un pinsîr, un fastidi (Alan Brusini, Gian Paolo Linda, I forescj); zoventût alegre, senze fastidis, passionade pa la art e pa vite libare (Zuan Lurinçon, La Madalene); no stâ vê fastidi, o pensi jo! (Laurin Zuan Nardin, Cjampanis)
   Sin. pinsîr , preocupazion , scrupul , spine , cruzi , cruzie , intric , probleme , lambic
4. s.m. situazion di dificoltât che e domande une soluzion:  no vevi fastidis cu la lenghe tabaiade, ma scrivi no vevi mai scrit (Max Mauro, Un Friûl difarent: i 90 mhz di Onde Furlane); cui fastidis de ricostruzion dal taramot in cjase, par cui che al ven dal Friûl taramotât, o cui fastidis di famee e dal impegn scolastic, nol reste timp di impegnâsi pe cause (Adrian Cescje, Memoriis di politiche linguistiche)
   Sin. probleme , dificoltât , berdei , gredei , ingredei , intric , imberdei
5. s.m. pierdite temporanie de cussience:  mi soi sintude a tirâ sù… po mi è vignût fastidi e mi soi sveade di gnot in speziarie dulà che chel om mi veve puartât (Pieri Somede dai Marcs, Resurezion a Pontinie)
   Sin. svariade , svaniment , imbast

Polirematichis e espressions idiomatichis

• dâ fastidi loc.v.
• fâ fastidi loc.v.
• metisi tai fastidis loc.v.

Proverbis:

• fîs piçui, fastidis piçui; fis grancj, fastidis grancj
• mil fastidis no pain un debit