Dizionari de Lenghe Furlane

pinsîr  pin|sîr  [FO]

1. s.m. facoltât e ativitât di doprâ la inteligjence, la memorie, la imagjinazion par elaborâ concets, vê cussience di se e interpretâ la realtât:  cheste memorie [la memorie di lavôr] e à une vore ce fâ cul pinsîr, la cussience e la pussibilitât di imparâ (Franc Fari, Il cjâf dai furlans); a suna di Nadâl. Un refal come di vints a i neta il pinseir e a jôt la vea di Nadâl par duta la vila (Novella Cantarutti, Deventâ stria)
   Var. pensîr , pensêr
2. s.m. complès di concezions di une cierte ete, scuele o persone:  une des carateristichis dal pinsîr umanistic rinassimentâl al è il tornâ aes lidrîs de civiltât, ven a stâi al mont classic cu la riscuvierte dai filosofs de antichitât (Fabian Ros, La invenzion dal stât); une fuarte influence e sarà chê di Tellini te formazion dal pinsîr autonomist di Felix Marchi, il fondadôr dal gjornâl "Patrie dal Friûl" daspò de seconde vuere mondiâl (Donato Toffoli, Il lunari mai jessût - Tellini te prime vuere mondiâl)
   Sin. dotrine , orientament , pensâ , pensament , posizion , teorie
3. s.m. concet che si pense, mût di pensâ, idee, opinion:  la stracadura a i inmatuiva il cjâf e a na i lassava pi cosi un pinseir (Novella Cantarutti, Il cosacut); cun chê mozion il Comitât al dîs «di interpretâ il pinsîr di ducj i furlans». E cheste e je une bale. Intant nol interprete il nestri (Josef Marchet, Cuarde e savon)
   Sin. convinzion , idee , parê² , pensâ , pensade , pensament , riflession , opinion
   
   1. robe che e ven imagjinade:  e gjoldeve dome cul pinsîr di tante robe cjandide che e varès svintulât e niçulât par un pieç tal aiar rampit (Maria Forte, Cjase di Dalban)
   2. robe che si pense di fâ o di otignî, che si vûl fâ o otignî:  Nicolau invezit al veve nome un pinsîr, saltâ fûr dal dut e par simpri di chê imprese disgraciade e maledete (Carlo Sgorlon, Ombris tal infinît)
      Sin. voie , intenzion , progjet , desideri , volê² , volontât , brame
4. s.m. robe che si imagjine e che e fâs stâ pôc cuiets:  beât tu che no tu âs tancj pinsîrs! (Pieri Somede dai Marcs, Barbane); lavorant si dismenteave dai siei pinsîrs, e dute la sô atenzion e jere pal lavôr (Carlo Sgorlon, Prime di sere)
   Sin. martiel , preocupazion , scrupul , spine , lancûr , carûl
5. s.m. dimostrazion di afiet, atenzion:  - O vignìn a rindii i onôrs dal paîs… - a diserin. Siôr Svualdin ju ringraciâ une vorone dal biel pinsîr (Dino Virgili, La aghe da pît la cleve); a son dome lis bestiis che a lassin lis lôr carognis dulà che a colin e no àn nissun pinsîr par lôr (Josef Marchet, Lis predicjis dal muini)
   Sin. atenzion
6. s.m. piçul regâl:  "Graciis! Ce biel regâl" "Oh, al è dome un pinsîr"
7. s.m. [TS] bot.com. sorte di margaritute, lat. sient. Bellis perpetua plena:  al jere Avrîl, che sui prâts a cucavin pestelacs e pinsîrs (Josef Marchet, Lis predicjis dal muini); tal zardin la floridure dai arbui e jere come un nûl fof colôr di rose, tes jechis i pinsîrs a puntinavin di blanc il vert molisit (Jolanda Mazzon, Fûr di timp)

Polirematichis e espressions idiomatichis

• dâsi pinsîr loc.v.
• fâ sù un pinsîr loc.v.
• mudâ pinsîr loc.v.
• vê pinsîr loc.v.

Proverbis:

• cent pinsîrs no pain un debit
• cent pinsîrs no pain un solt
• il prin pinsîr al è simpri il miôr
• la gnot e je la mari dai pinsîrs
• lis gusielis a puartin pinsîrs
• lis oris de matine a son la mari dai mistîrs, lis oris da la sere a son la mari dai pinsîrs
• nissune robe no ingjane plui dal pinsîr
• no si po cence pinsîr educâ ben i cavalîrs