teorie
/-ì-/
te|o|ri|e
[FO]
-
s.f.
esposizion astrate e sistematiche dai principis di un setôr dal savê, che e vûl interpretâ la realtât e in câs ancje indreçâ une linie di azion:
schemis di contabilitât nazionâl che a vevin la fonde su la teorie macroeconomiche dal grant economist inglês John Maynard Keynes (Marzi di Strassolt, Dal Prodot Interni Lort aes misuris dal benstâ);
la fisiche cuantistiche e puartà a la teorie des parteselis e des interazions (o fuarcis) fondamentâls, ven a stâi a la Teorie Cuantistiche dai Cjamps (Sergio Cecotti, Teologjie algjebriche);
in Friûl la çampe marxiste […] e ignorave, come che no fos mai esistude, la teorie leniniste su la cuistion des nazionalitâts (Adrian Cescje, Memoriis di politiche linguistiche)
-
s.f.
complès di regulis astratis:
no si impare a lâ in biciclete studiant la teorie, ancje se a insegnâle al fos Einstein in persone (Franc Fari, Il cjâf dai furlans)
-
s.f.
il pinsîr a pet de azion, de pratiche, de emotivitât e v.i.:
un om plen di principis e di teoriis e frêt come il nâs dal cjan (Antoni Beline, Pre Pitin)
-
s.f.
mût di pensâ:
Gjovanin Bondance al leve a vendi bagjigjis cul zei. La sô teorie e jere che tal spaç al sta il vuadagn. E par bati la concorence, al vendeve i bagjigjis sot cost (Alan Brusini, Amîs come prime)
Sin. concezion
, filosofie
, idee
-
spec. tal pl., ideis, concezions:
«[…] Sintît siorut, jo no us cognòs plui di tant, ma lis vuestris teoriis, no mi van, no mi plasin par nuie» (Tarcisio Venuti, La cjase di Toni)
-
idee ancjemò no dimostrade:
al capive che se la sô teorie [suntun omicidi] e fos risultade vere, e varès fat nassi un gran davoi tal piçul paisut (Roberto Ongaro, Cretevierte)
-
s.f.
[TS]
stor.
inte Grecie antighe, delegazion mandade di une citât aes cerimoniis religjosis, ai zûcs, e v.i.
-
s.f.
[TS]
art
rapresentazion di plui figuris in serie:
inte abside si puedin viodi la Crucifission e la Teorie dai dodis Apuestui (Aministrazion Publiche, Glesie di Sant Stiefin in Clame)
-
s.f.
(fig.)
sucession di elements, fats, robis e v.i.:
la Vie e passave traviers une lungje teorie di segns di tripudi che a manifestavin la gjonde dionisiache di sucès e vitoriis concuistadis (Adrian Cescje, Viaç aes origjins dal Logos)