Dizionari de Lenghe Furlane

musiche  /-ù-/  mu|si|che  [FO]

1. s.f. art dal cumbinâ i suns, produsûts de vôs umane o di struments, daûr di regulis fissadis:  Vigji Lunc […] al mandave so fi Sergjo dal Lunc a Udin a studiâ musiche (Ivano Urli, La musiche); dongje de musiche, il festival al cjaparà dentri ancje il cine e la leterature intes lenghis minorizadis de Europe (Erika Adami, Fieste de musiche in lenghe)
   
   1. ancje cun adietîfs o specificazions, gjenar particolâr di chê art:  int plui interessade ae new wave, al punk, ae musiche sperimentâl (Max Mauro, Un Friûl difarent: i 90 mhz di Onde Furlane); [Emerson, Lake & Palmer] a rivarin a unî la musiche classiche cul rock e a venderin ben 40 milions di discs (Checo Tam, Ladies and gentlemen… Emerson, Lake & Palmer!)
2. s.f. ogni componiment o esecuzion musicâl:  a jentrarin dôs sioris, a butarin ator il voli pal cafè, a ordenarin alc di bevi restant in pîts, po si faserin dongje dal jukebox e si fermarin a lei i nons des musichis (Agnul di Spere, L'avignî di Antoni Cossâr)
3. s.f. (estens.) grup di personis che a sunin struments musicâi:  "E se e vedès ce fieste, ce bordel... e son trê musichis che e sunin! "Balino ancje?" "Po, sintiment, no vuelie?" (Bepo Marion, Il canocjâl de contesse); la musiche di Naiarêt e rivà sù cun chês penacjeris e i struments lusints (Dino Virgili, La aghe da pît la cleve)
   Sin. orchestre , bande , complès
   
   1. implant audio:  metût la grisiole sul sofit, piturât i mûrs, tirât i fîi pe musiche e lis cassis par sintîle (Mario Beltramini, Jo e Graziella)
4. s.f. (fig.) sun, spec. seguitîf o ripetût, che al plâs:  la musiche dai falcets e sunave dilunc lis viis de jerbe in tai (Dino Virgili, La massarie); [lis aganis] a cjantin une cjançonete che a compagnin cu la musiche de aghe e cul sbati des piecis (Catarine Percude, Lis aganis di Borgnan)
5. s.f. (fig.) efiet sonôr tipic di une lenghe o di un dialet:  lis varietâts cjargnelis a àn tantis diferencis tra di lôr, ma a àn un pôc dutis chê stesse musiche
   Sin. ande , acent , genghe
6. s.f. (antifr., iron.) barufe o bruntulament:  il vuestri cristian, comari 'Sese, par no stâ a sintî chê musiche in cjase, al à puartade la residence tal cjanton dal banc de ostarie (Josef Marchet, Lis predicjis dal muini)
   Sin. conciert , senade , sene¹
7. s.f. (fig.) situazion, spec. se e torne a ripetisi:  dopo un bon secul, e son ancjemò peâts intor dal «Primato» di Gioberti. No si podaressial cambiâ musiche? (Josef Marchet, Cumò che o savìn…); mi à dit che ator dal paîs a jerin une setantine di partigjans, che bisugnave proviodi di mangjâ, che ur coventave une vore di bêçs. O ai capît subit la musiche (Pieri Somede dai Marcs, Gnot clare gnot scure); la taule dal tinel e jere plene di cjartis e scartafàs dulà che chel siôr al cirive e po al cjapave notis su di un sfuei grant come un gjornâl. Cheste musiche e durà plui di une setemane (Pieri Menis, Chei di Muraie)
   Sin. chê , liende , naine , solfe , storie

Polirematichis e espressions idiomatichis

• a timp di musiche loc.av.
• cambiâ musiche loc.v.
• meti in musiche loc.v.

Proverbis:

• cheste musiche no va sun chest bal
• si mude musicants ma no musiche
• si mude musiche ma no musicants