Dizionari de Lenghe Furlane

sene¹  /sè-/  se|ne  [FO]

1. s.f. intun teatri, spazi, fat par solit cuntun breâr plui adalt de platee, li che si davuelç la azion:  Dorine e travierse la sene (Pieri Piçul, Vieri e gnûf); smorfeose, vistude di camarele e jentre su la sene, dimenantsi te vite, si met a fevelâ e po e va a sentâsi su di une bancje (Pieri Somede dai Marcs, Butìnle in staiare)
   Cfr. breâr , palc
2. s.f. [TS] teatr., spet. complès dai elements di un teatri, di studi o di un ambient di un cine o di un program televisîf, par costruî il contor li che si davuelç la azion:  la sene e rapresente une grant loze di un palaç di siôrs vierte su di un zardin colm e dut florît di rosis (Pieri Somede dai Marcs, Mame…)
3. s.f. [TS] teatr. ognidune des parts che a dividin un at teatrâl:  la sene e tache cul prolic di un pastôr o di un agnul, che al invide a lâ al presepi a puartâ i regâi (Bepi Agostinis, Storie e cronistorie dal teatri in Friûl)
   Sin. cuadri
4. s.f. [TS] teatr., cinem. intune opare teatrâl, cinematografiche o televisive, unitât minime fate di une azion autonome e coerente cul rest dal spetacul:  dongje des localizazions citadinis, o vin une alternance di senis che si davuelzin in plene nature, une nature salvadie e fuarte (Fabian Ros, A esmorga)
   Sin. cuadri
5. s.f. (fig.) il teatri, il mont teatrâl, la ativitât di atôr o altre profession che e à a ce fâ cul teatri:  [Andrea Collavino] al fâs par plui di 20 agns la profession di atôr e chê di regjist, dispès dongje di mestris de sene taliane e foreste (Bepi Agostinis, Storie e cronistorie dal teatri in Friûl)
   Sin. teatri
6. s.f. lûc dulà che al sucêt un ciert fat e complès di acjadiments che i zirin ator:  un delit che al viodeve su la sene un cadavar insanganât (Fabian Ros, L'om che al pierdeve pinsîrs pe strade)
   Sin. senari¹
7. s.f. (fig.) complès des cundizions li che al sucêt alc o li che cdn. si cjate a jessi:  la aparizion di gnûfs protagoniscj su la sene sociâl e la complicazion dai rapuarts economics a tachin a rapresentâ un pericul di roture dal ecuilibri dal mont medievâl (Fabian Ros, La invenzion dal stât); trasmissions "cult", che a fasaran cognossi Onde Furlane ancje fûr dal Friûl, intai ambients de sene musicâl alternative (Max Mauro, Un Friûl difarent: i 90 mhz di Onde Furlane)
   Sin. panorame , senari¹
8. s.f. fat, acjadiment che si proferìs a cui che al cjale:  il pari e il barbe, a metin jù il lôr frut muart te tremende bataie di Pâl Piçul […] Pôc lontan, cence flât, cidins, cul cûr sglonf, doi uficiâi a vevin viodude la sene (Pieri Menis, Funerâl a Pâl Piçul); un che al veve viodût la sene di lontan al jere lât a contâ ai carabinîrs che al jere stât lui, Eliseo, a provocâ il muart (Carlo Sgorlon, Prime di sere)
   Sin. câs , cuadri , spieli , truc¹ , viste
9. s.f. (fig.) robe che si fâs par fente:  o vevi metude sù dute une sene e une fente par introdusimi in cjase sô (Carlo Sgorlon, Il dolfin)
   Sin. cine , circul , comedie , menade , pantumine , fente
10. s.f. (fig.) manifestazion o reazion fûr di misure:  ce malapaiât che al jere restât. Pursì nol veve fate nissune sene (Gianni Gregoricchio, Trê feminis); Zuan al vaìve… Une sene, une sene che no us dîs… e jere vignude ancje Marie a saludânus e ancje jê e vaìve (Pieri Menis, Sul agâr)

Polirematichis e espressions idiomatichis

• a sene vierte loc.av., loc.adi.inv.
• a sogjet loc.av., loc.adi.inv.
• lâ in sene loc.v.
• meti in sene loc.v.
• puartâ in sene loc.v.
• robâ la sene loc.v.