Dizionari de Lenghe Furlane

viste  vis|te  [FO]

1. s.f. facoltât di viodi, sens che al regole la percezion dai stimui visîfs:  cuasi dutis lis speciis di primâts a vivin sui arbui, par chest a àn tornât a disvilupâ la viste (di profonditât e dai colôrs) (Franc Fari, La evoluzion dal çurviel e de cussience tai vertebrâts); "Âstu pierdût alc? Lasse jo, che o ai buine viste" (Costantino Smaniotto, Co l'amôr al cimie); a son tancj agn che la mê viste no je dal dut in ordin (Carlo Sgorlon, Il dolfin)
   Sin. viodi , vision
   
   1. (meton.) i voi, tant che orghins che a permetin di viodi:  cuant che la machine e passà tal mieç dal cimitieri disfat, si taponarin la viste cu lis mans (Dino Virgili, La aghe da pît la cleve); a una grandissima distança che la vista ja ce fâ a superâla, chê muraia maestosa de lis Alpis (Federigo Comelli, Il me paîs)
2. s.f. pussibilitât di viodi, visuâl:  la viste a ere inceade di un palaç, di une lûs, di un sogjet che al ocupave dut il plan visîf (Stiefin Morat, Kebar krossè)
   Sin. cjalade , visuâl
3. s.f. ce che si viôt, sene, spetacul:  si mostrà lôr a pôcs varcs di distança la barcja del pescjadôr, e un: «Coragjo, sin ca par judâvi!» […] Si slargjà il cûr ai doi infeliçs a chê vista, a chê vôs (Federigo Comelli, Il me paîs); par cui che al jentre tal Museu, e al cjape la prime puarte che e mene te prime stanzie, si impon za di li la viste dai Doi Kouroi (Adrian Cescje, Viaç aes origjins dal Logos); a si voltavin indaûr jù pe stradute de Cleve fintremai che si intignive la viste de cjase insom dal cuel (Dino Virgili, La aghe da pît la cleve)
   Sin. cjalade , sene¹ , spetacul , viodude
   
   1. ce che si rive a viodi a larc intun spazi viert:  finalmentri o soi restât bessôl su la Riva degli Schiavoni a gjoldimi la viste (Arturo Feruglio, Viaç a Vignesie); o vevi sgjarpedât sù pe rive de strade clapignose, fin là sù, a gjoldimi la viste de plane (Gianni Gregoricchio, Trê feminis)
      Sin. panorame , paisaç , viodude
4. s.f. (fig.) mût di viodi, di considerâ lis robis, di interpretâ la realtât:  umign libars e di viste largje (Josef Marchet, Federazion europee tra nazions o tra regjons?)
5. s.f. maniere di fâ creançose che e mostre preocupazion par cdn. altri:  al jere stât simpri plen di vistis che, a jê, che no 'nd veve mai vudis di nissun, in vite sô, i fasevin une vorone di plasê (Roberto Ongaro, Cretevierte)
   Sin. rivuart¹
6. s.f. (fig.) tal pl., ce che al conven, che al torne cont che al sucedi tal avignî:  "O ai bisugne di savêlu pes mês vistis, sâstu… Mi pâr di vê capît che e ûl butâ par aiar il mio matrimoni cun Gjelindo. E no vorès…" (Costantino Smaniotto, Co l'amôr al cimie)
   Sin. interès , tornecont , prospetive

Polirematichis e espressions idiomatichis

• a prime viste loc.av.
• pierdi di viste loc.v.
• vê la viste lungje loc.v.