Dizionari de Lenghe Furlane

rivuart¹  /-à-/  ri|vuart  [FO]

1. s.m. mût di compuartâsi creançôs che al cîr di no dâ fastidi:  propit cussì, une delusion, ma nissun fevelave par rivuart di lui e de famee (Alan Brusini, Come tai romançs)
   Sin. riten , scrupul , rispiet
   Var. riguart¹ , raguart¹ , ravuart¹ , revuart¹ , reguart¹
   
   1. il compuartâsi in maniere di no vê o di no dâ consecuencis negativis, spec. pe salût:  chei che a fumin a varessin di vê rivuart pai adolessents, pes feminis che a spietin un frut e, in gjenar, par ducj chei che ur stan ator (Guglielmo Pitzalis, Stude i spagnolets!)
   2. ande di sudizion e sumission:  Vigji Scuete nol à parevoi ni smuars in bocje: nol à rivuart par nissun, ni zovins ni viei, ni puars ni siôrs, ni ignorants ni studiâts, nancje pe sô parintât (Josef Marchet, Lis predicjis dal muini)
   3. maniere di fâ o azion che e dimostre rispiet e afiet:  ancjemò frutate, e cognossè Vigjut, un fantat di Baracêt, plen di rivuarts par jê, no viodè la ore di sposâlu (Lucio Perès, Mê none Miute)
2. s.m. discrezion e prudence intal pandi o tal domandâ i sintiments, lis ideis, lis intenzions che si àn:  cul cûr intal cuel mi veve dite che intai ultins mês nol rivave a capî ce che al jere daûr a sucedimi. In sumis, cun dut il rivuart pussibil, al cirive di fâmi confidâ cun lui (Gianni Gregoricchio, Trê feminis); cuant che [il cuadri] al fo finît se a nal era par riguart varès cjapât Liviero a braçacuel (Novella Cantarutti, Un pitour par me)
   Sin. modestie , pudôr , rispiet , ritegn , vergogne
3. s.m. pinsîr che al fâs stâ mâl, che al da angosse:  dome che e diseve: "A Firenze ci sono molte distrazioni: vetrine, Caffè eleganti e musei meravigliosi". Simpri Firenze… Firenze te sô bocje, e cun chel rivuart i nasseve un paragon mâr dentri di se. Nol jentrave il paîs tal so spirt (Maria Forte, Cjase di Dalban); e cjalave il len cu la plee dure di cui che al è tormentât di rivuarts che no rivin a sfantâsi (Maria Forte, Il tei)
   Sin. pinsîr , scrupul
4. s.m. il cjalâ, ancje par protezi:  i vîfs e i muarts a vivin dongjelaltris: e a son ducj sot dal riguart dal Signôr benedet (Josef Cjargnel, La fogolade dal bosc)
   Sin. cjalade
5. s.m. tiere, teritori, zone che e aparten a cdn.:  [i pagans] a vevin ancjemò paronance espotiche di cualchi sît, plaçât sul ôr dal riguart de int civîl (Josef Cjargnel, I pagans di Muine)
6. prep. par introdusi complements di argoment, limitazion, interès:  lis sorestantis a vevin cambiât dal dut il lôr fâ, rivuart 'Sine Malet (Roberto Ongaro, Il muc)
   Sin. rivuart a , in rivuart a , a rivuart di , in cont di , a proposit di , rispiet a , cun , par

Polirematichis e espressions idiomatichis

• a rivuart di loc.prep.
• fâsi rivuart loc.v.
• in rivuart a loc.prep.
• in rivuart di loc.prep.
• rivuart a loc.prep.