vergogne
/-ò-/
ver|go|gne
[FO]
-
s.f.
sintiment di turbament e mortificazion profonde che al à cdn. o par vê vude esponude la sô intimitât o savint che un compuartament o une situazion che lu rivuardin a son mâl judicâts:
jê che e veve cjapât sù tal pecjât, sepulide vive te vergogne dal disonôr (Dino Virgili, La aghe da pît la cleve);
ce vergogne che lis lôr rognis a vessin passât lis puartis di cjase! (Maria Forte, La tiere di Lansing);
la pôre dal doman si zontave a la vergogne di jessi li a slungjâ la man come un puar (Carlo Sgorlon, Prime di sere)
Var. vergonze
-
cun valôr di comant, esortazion a vê chel sintiment e a compuartâsi miôr o a tasê:
Vergogna, tasêt, che i lu savìn ben / parcè che i tavanais a scûr e a lum (Giorgio Ferigo, Sul stamp di Carlo Porta)
-
s.f.
sens di imberdei, di sudizion, di protezion di se stes e v.i. tipic des personis timidis:
chel pinsîr i smolà lis lagrimis, cence vergogne (Maria Forte, Cjase di Dalban);
l'amôr e la vergogne no van dacuardi intai paîs e cussì lôr a son lâts vie, bandonant la compagnie, lis cjacaris e lis scusis (Cristina Noacco, Faliscjis);
al veve un pocje di vergogne a vierzi dal dut il so cûr (Franca Mainardis, Il sium di Lissandri)
Sin. pudôr
, sudizion
-
s.f.
pierdite dal onôr, dal rispiet public:
tu no stâ contâle a di nissun, nancje a Nene, che i miei fruts no sepin mai, mai il pês de vergogne che je colade su la nestre cjase (Pieri Somede dai Marcs, Resurezion a Pontinie)
Sin. disonôr
-
s.f.
cjosse o persone che e je cause o reson di disonôr:
si cjamin la cussience di colpis, di vergognis, di birbantariis (Josef Marchet, Lis predicjis dal muini);
a misdì al jere za çurul e la sere in bale. «Tu sês une vergogne…» e tontonave done Pine (Pieri Menis, Chei di Muraie)
Sin. infamie
, vituperi
-
ancje cun valôr mancul fuart, robe pôc di sest, che no fâs fâ biele figure, che no pâr bon:
«A 'nd fasarai une gnove e biele, dute di lin…; no i parie une vergogne, siôr vicjari, une tavaie di chê fate?» (Pieri Menis, I sioperos dal muini)
-
(fig., iperb.)
robe che si calcole di no podê acetâ:
ise chê la maniere di tratâ cui siei impiegâts, a è propit une vergogne, ma i 'nd ai ditis… (Pieri Somede dai Marcs, Vilie di Nadâl (teatri))
-
s.f.
(eufem.)
ancje e soredut tal pl., lis parts intimis:
o cirivi di taponâmi lis vergognis tirant injù la maie che mi rivave sì e no al boton de panze (Alan Brusini, Gian Paolo Linda, I forescj);
"Cjo un peçot, biadaç - dissal - taponiti almancul la vergogne!" e i butà un sbrendul di cjamesate che se leàs tor la panze (Dino Virgili, Titon dai siet pecjâts mortâi)
Proverbis:
- cuant che la ambizion e galope, la vergogne e monte in grope
- cui che al vîf cence onôr al mûr cence vergogne
- prometi e no mantignî e je vergogne di no dî
- tante vergogne a domandâ che a neâ