Dizionari de Lenghe Furlane

circul  /cì-/  cir|cul  [AF]

1. s.m. forme o struture o disposizion taronde:  fra un circul di vecjis çocjis di cjastinâr e je une buse plene di fueis secjis (Pieri Menis, Lis leiendis di Buie); dulà che trops condanâts in un lûc lavorin assieme, i soldâts di scorta i formin ator di lôr un circul, e abadin che nissun i vadi fûr sença ocorença (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera)
   Sin. taront , tont , zîr , cercli
2. s.m. grup o associazion che si dediche in particolâr a une ativitât, soredut in cjamp culturâl, ricreatîf e v.i.:  [Cavedalis] al veve promovût il 3 di Otubar dal '48 une leç che e proibive ai militârs di fâ part dai circui politics cence autorizazion dai superiôrs (Giovanni Pillinini, Zuan Batiste Cavedalis - Une vite esemplâr); a mi contin che al sei stât un di chei siôrs dal Circul Artistic che al si à impensât di vignî fûr cun chê… ce si puedial dî?… strambarie, di traspuartâ la fontane di place Contarene (Guido Antonioli, Florean dal Palaç, I, 1)
   Sin. associazion , clape , socie¹ , societât , grup¹
   
   1. sede di chel grup o di chê associazion:  una volta ogni seis meis i ‘sevin tal circul dai italians (Maurizio Driol, Maria Sandra Lenarduzzi, Cjapâ sù la valîs)
3. s.m. spazi o struture, ancje cuvierte ma in gjenar provisorie e itinerante, par spetacui comics, acrobaziis, e v.i. e ancje i spetacui stes, lis compagniis che ju fasin e v.i.
   Sin. circ
   Cfr. salt¹
   
   1. (fig.) situazion comiche o confusionade o pôc serie o sim.
      Sin. cine , circ
4. s.m. [FÛ] aministrazion che e cjape dentri une cierte zone e zone cjapade dentri di une stesse aministrazion:  il circul di Gurize (Giulio Andrea Pirona, Novo vocabolario friulano)
   
   1. [TS] scol. viôt circul didatic :  Aghis al fo un grant biel progjet davuelt di plui scuelis di plui istitûts scolastics de Provincie di Udin, l'Istitût comprensîfs di Faedis, di Tavagnà, lis Direzions Didatichis di Trasaghis e dal IV Circul di Udin (Adrian Cescje, Memoriis di politiche linguistiche)
5. s.m. fenomen o dinamiche che a vedin une ande che si pues descrivi come un cicli o come une parabule:  il circul al tache a lâ devantdaûr e no je une robe che la finanziarie e podi permetisi (Raffaele Serafini, Contis sot spirt)

Polirematichis e espressions idiomatichis

• circul di sant Marc loc.s.m.
• circul polâr loc.s.m.
• circul polâr antartic loc.s.m.
• circul polâr artic loc.s.m.