Dizionari de Lenghe Furlane

salt¹  salt  [FO]

1. s.m. moviment che si fâs distacantsi dal dut de tiere, o di dulà che si è, par tornâ jù tal stes puest o inaltrò, ancje su di un plan plui alt o plui bas:  il jeur al fâs un salt e vie lui! (Meni Ucel, Cjaçadôrs); un cjavrûl al petà un salt pôc lontan (Maria Forte, La tiere di Lansing); fruts che si rimpinavin sù par cualchi brusse o, i plui ardîts, su di cualchi agacie, par petâ il salt ta la aghe (Gianluca Franco, Cuant che l'Istât al finìs - Ogni etât la sô maravee)
   Sin. sbalç , zup
   Cfr. varc , slanc , scjas¹
   
   1. (estens.) cualsisei moviment svelt par montâ, dismontâ, lâ di cualchi bande:  a rivarin cui cjavai. A dismontarin intun salt (Dino Virgili, La aghe da pît la cleve); dopo, sul tart, un salt su la biciclete e vie là jù di Rosine che dal infalibil i vignive incuintri (Alan Brusini, Il mâl dal tor)
   2. reazion istintive che e compuarte un moviment imburît:  Zorç al fasè un salt pe maravee e pe pôre (Checo Tam, Lunga e dritta correva la strada); "Oh! sì benedete (al fâs un salt di ligrie) ai dite simpri jo che tu sês une buine frute…" (Pieri Somede dai Marcs, La buteghe dal barbîr)
2. s.m. moviment di alc che, par efiet de velocitât, dal fat di bati o di une altre fuarce, si distache di tiere:  [lant fûr di strade] cuntun grant salt si sin cjatâts tal mieç di un cjamp, cu la machine dute stuarte e a fîl di un canâl, che al mancjave dome un pas par plombâ dentri (Antoni Beline, Pre Pitin); un camion todesc plen di munizions al ven centrât in plen e, dal curtîl dal asîl, al fâs un salt fin sul cuviert de cjase di Pascat, adulà che al reste cu lis ruedis par aiar (Alan Brusini, Amîs come prime)
   Sin. sbalç
3. s.m. il lâ svelt di un puest a di un altri:  «Pieri, tu che tu âs gjambe, fâs un salt a cjolinus un boçon di bire.» (Pieri Menis, La gjaline robade)
   Sin. corse , sbrissade
   
   1. visite svelte:  "Bevêt in pâs, che jo o fâs un salt là de morose e o torni dal moment." (Roberto Ongaro, Il muc); o scuen lâ un salt ca jù di Catin… prin che al vegni gnot… (Pieri Menis, Sul agâr)
   2. timp curt che al dure une visite svelte:  "O stoi cirint une robe, ven un salt ancje tu, dai…" (Checo Tam, Poche! Mone)
      Sin. lamp¹ , moment
   3. (fig.) esperience reâl o imagjinade che si somee a une visite, a un viaç curt:  une domenie Toni al torne li dal vecjo cjasâl di piere, come a volê fâ un salt tal so passât (Checo Tam, Un cjasâl, une vuere nucleâr)
4. s.m. [TS] sport viôt salt in alt , viôt salt in lunc
   
   1. specialitât li che si butisi ta la aghe di un plan elevât, fasint figuris acrobatichis
      Sin. zup
   2. specialitât che e sta tal saltâ cui schîs di un trampulin, o, tal schi acrobatic, di rialçs dal teren fasint figuris particolârs, o, tal schi nautic, di passâ sore une pedane tirâts di un motoscaf e saltâ in aghe
5. s.m. tal pl., spetacul di acrobazie:  sul marcjât di Sant Scjefin a son za lis cavalaricis e ancje i salts (Maria Forte, La tiere di Lansing)
6. s.m. disnivel sec:  Matie al veve sintût dûl di chei roncs che a levin jù a salts incuintri ai cjamps gras slargjâts te planure, abàs dal cuel dai Moràs (Pieri Menis, Sul agâr)
   
   1. colâ de aghe li di un disnivel:  cumò sul flum, disot de stazion, li dal salt grant, a lavorin a fabricâ (Dino Virgili, La aghe da pît la cleve); i vivevi cu la cjera: il prât e i lens, i trois e i salts da li aghi, e dopo il ciel, i gorcs da la Miduna (Novella Cantarutti, Pesteli)
      Sin. pissande
7. s.m. (fig.) passaç, svelt o in ogni câs net, di une cundizion a di une altre:  la Italie, finalmentri, in fat di eficience organizative e statistiche, e à fat il salt di cualitât che si sperave e che si spietave (Riedo Pup, I talians in esodo); la sô invenzion e à viert une strade e e à fat fâ un "salt tecnologjic" grandiôs (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Sin. cressude , impenade , montade , sbalç
8. s.m. diference, distac o interval tal timp, tal spazi, tal ordin logjic e v.i.:  i fîs di Catine a nasserin un daûr dal altri: Pieri intal cuindis […]; Nedo e Meni - zimui - intal disenûf; Elide intal vincjeun e - cuntun salt di cinc agns - Jacum (Gianni Gregoricchio, Trê feminis)

Polirematichis e espressions idiomatichis

• a salts loc.av., loc.adi.inv.

Proverbis:

• ogni cjavret al à di fâ il so saltet
• ogni cjavret il so saltet
• ogni zocul al fâs il so salt
• polente e lat bulît, cuatri salts al è digjerît