Dizionari de Lenghe Furlane

zîr  zîr  [FO]

1. s.m. moviment circolâr o plui o mancul circolâr:  la Roie e sclocjave difûr, tun discori cence padin di aghe sbaciade tai ingredeis des ruedis e tal zîr dai mulignei (Maria Forte, Cjase di Dalban); mi domandà il canocjâl par lâ daûr il svol di doi falcuçs, a gjavâmi fûr di chel fantasticâ. Al ste minûts intîrs a cjalâ i lôr zîrs a larc (Carlo Sgorlon, Il dolfin); e de lis stelis osservant il zîr, / un Pronostic o scrîf in poesie (Pieri Çorut, Pronostic del 1821)
   Sin. zirade , volt¹
   
   1. ognidun dai moviments complets di un mecanisim, spec. di un motôr:  sierâ la puarte cu la clâf. Doi zîrs. Che in dì di vuê no si pues infidâsi (Gianluca Franco, Cuant che l'Istât al finìs - Ogni etât la sô maravee); il Shell al faseve lâ sù di zîrs il motôr che lu imbalave (Dino Virgili, La strade come un destin)
2. s.m. forme, struture, disposizion plui o mancul circolâr o che e cjape dentri alc:  [a Palme] i forin zontâts trê zîrs di fortificazions (Luca Zoratti, Passât gloriôs, avignî dubiôs)
   Sin. cercli , volt¹
   
   1. ogni singul passaç di alc che al è fat sù:  "Trê zîrs [di cuarde] sono avonde [par leâju]?" (Stiefin Morat, Donald dal Tiliment); al jere un drâc cu la code intorcolade in plui zîrs (Giovanni Battauz, Flavio Cossar, Renato Iacumin, I mosaics de basiliche di Aquilee)
3. s.m. circonference di une part dal cuarp o di un vistît o sim.:  il parturî e i agns i àn slargjâts i flancs e il zîr de vite (Gianni Gregoricchio, Trê feminis)
4. s.m. visite o ispezion a plui elements, robis, personis, lûcs e v.i.:  a faserin il zîr des tassis [di modons] ancjemò cjaldis di for, e, a voli, a prossumarin di rivâ al numar (Maria Forte, La tiere di Lansing); Nearêt al jere fûr dal zîr dai gjendarmis austriacs e al lave ben par incuintris segrets (Elio Varutti, Il Risorziment a Martignà); il plevan […] al scomençâ a fâ il zîr par benedî lis cjasis (Pieri Somede dai Marcs, Par une lengate)
5. s.m. cjaminade o jessude, plui o mancul lungje, ancje in biciclete, in machine e v.i., spec. par straviâsi:  intant che lu spietìn o lin a fâ un zîr par Padue (Mario Beltramini, Jo e Graziella); a fasevin zîrs [in biciclete] ator di Vendâs, Tuçan, Taraban fin al Incassar; po dilunc il bosc dal Tamarêt (Alan Brusini, Par stradis lungjis)
   Cfr. cjaminade , spassizade , pas , visite , gjite , viaç
6. s.m. gare a tapis:  viodi la tape dal zîr di Italie (Riedo Pup, Il scandul dal Corpus Domini)
7. s.m. dade di timp che si pues stâ intun puest daûr di un turni, daûr dal paiament di un biliet e v.i.:  [te gjostre] si pensave dome a trai e a zirâ plui svelts che si podeve par restâ sù plui di ducj e vinci un altri zîr (Cristina Noacco, Faliscjis); al jere alì dongje un grop di frutats che, cence bêçs, a spietavin di fâ a mache cualchi zîr montant di sbrisson cuant che il paron no ju viodeve (Pieri Somede dai Marcs, La cavalarice)
8. s.m. moment li che al tocje alc, al sucêt alc o che si à une pussibilitât o ocasion:  sta fer un zîr [tal zûc da la ocje] (Erika Adami, Il zûc de ocje in lenghe); il probleme de normalizazion dal corpus de lenghe nol pues sei ancjemò frontât sul plan politic. Par chest zîr o vin di contentâsi (Adrian Cescje, Memoriis di politiche linguistiche)
   Sin. volte , turni , viaç
9. s.m. sucession dal timp, cun dadis che a tornin in maniere cicliche o cuntune parabule jenfri doi tiermins:  Viertis e Sieradis cence storie, dentri dal zîr piçul dal timp, cun chê vite incidine che e gote jù in zornadis compagnis une da la altre (Dino Virgili, La aghe da pît la cleve)
10. s.m. secuence di azions cuntun fin o cuntune relazion une cun chê altre:  Konko al à scugnût scjampâ parcè che prin o dopo lu varessin cadumât… sâstu, tal zîr di svindics che ti disevi lui al jere deventât masse periculôs (Stiefin Morat, Donald dal Tiliment); viodistu, al è dut un zîr: cuant che mi pain me, jo ti pai te (Carlo Sgorlon, Prime di sere)
    Sin. cjadene , sucession , secuence
    
    1. mudament, ancje svelt, li che alc o cdn. al cjape il puest di alc altri o cdn. altri:  intal gno paîs al è dut un zîr di predis. Di cuant che o soi nassût, ai vût ce fâ cun sîs predis diferents (AAVV, Sul florî)
11. s.m. tai zûcs di cjartis, un ciert numar di mans di zuiâ:  o soi daûr a vinci money a camionadis, fradi! Tu ten dûr ancjemò une miezore che o finìs il zîr [a poker] e dopo o lin vie (Stiefin Morat, Donald dal Tiliment)
12. s.m. robe di bevi, o ancje di mangjâ o altri, servide intune volte a un grup di personis:  [al diseve] che lui al veve seit e che i vevi di lâ a ordenâ un altri zîr (Stiefin Morat, Kebar krossè)
13. s.m. grup di personis che a àn in comun etât, interès, ativitâts e v.i.:  la Miute e la Rosine a fasevin simpri la miôr figure, ancje tal zîr des fantatis di Udin (Maria Forte, Cjase di Dalban); puartâ lis tematichis dal autonomisim fûr dal zîr dai autonomiscj e di fâ cressi dut il moviment (Max Mauro, Un Friûl difarent: i 90 mhz di Onde Furlane)
    Sin. circul , clape , cubie , grup¹
    
    1. (zerg.) frecuentazion, compagnie di cierte int:  ancje se al è vedul al à i siei zîrs, la cjace, i siei lavoruts, une gnove femine (Igor Londero, Un blanc e un neri); un zîr di moroseçs maschîi de bande di chel altri quondam (Sandri Di Suald, Ah! la provincie)
14. s.m. cuantitât di afârs economics, valôr in monede di dutis lis robis che si vendin:  si calcole che lis scuelis estivis a movin un zîr economic di 50 milions di euros ad an (Carli Pup, Irlande: la sierade des scuelis estivis e menace il Gaeltacht); chê strade e je chê che e tire di plui! Li a son i locâi che a van di plui, li al è plui zîr, plui marcjât, plui bêçs (Stiefin Morat, Donald dal Tiliment)
    
    1. ativitât economiche, ancje no oneste:  polvars, pirulis, feminis, oms, zûcs, scomessis […] Ancje la ostarie dulà che il to amì al zuiave di cjartis e fâs part dal so zîr (Stiefin Morat, Donald dal Tiliment)
15. s.m. [TS] artes. tal lavôr di gucje, il completament di une rie:  epûr mi pâr di no vê sbaliât, no volarès che mi tocjàs disfâ dut un zîr di fiers (Pieri Somede dai Marcs, Il prossim)
    Sin. trame
16. s.m. [TS] anat. plee de superficie di un orghin o di une struture anatomiche:  lis areis ativadis pe prime lenghe a jerin lis areis perisilvianis, cjapant dentri il zîr angolâr (Ba 39), i zîrs temporâi superiôr e median (Ba 21 e 22), il zîr frontâl inferiôr (Ba 45) e il pôl temporâl (Ba 38) (Daniela Perani, Neuroimagjins funzionâls e cerviel bilengâl)
17. s.m. articolazion:  [lu torturavin] cul molâi l'eletric tai zîrs dai braçs e des gjambis (Ivano Urli, Storie di Min)

Polirematichis e espressions idiomatichis

• cjapâ in zîr loc.v.
• cjoli in zîr loc.v.
• intal zîr di loc.v.
• sù di zîrs loc.av., loc.adi.inv.
• tal zîr di loc.v.

Proverbis:

• cu la pazience il pedoli al à fat il zîr dal mont