Dizionari de Lenghe Furlane

cjadene  /-dè-/  cja|de|ne  [FO]

1. s.f. sfilze di anei di fier o sim., leâts fra di lôr, doprade par peâ, picjâ, sierâ, e v.i.:  la cjadene dal fogolâr; la cjadene dal poç; leâ la biciclete cu la cjadene; sierâ il porton cu la cjadene; in mancul che si sta a dîlu, al nas un cjadaldiaul e un clamâsi, e dut ator un vuacâ di cjans peâts aes cjadenis (Pieri Menis, Doro); i bûs su la strade a scjassavin il cjâf sdrindulant lis cjadenis dal jôf e il cjaradôr si voltà come a visâsi che la sô strade lu spietave (Dino Virgili, La aghe da pît la cleve); i galiots a vevin la cjadene tal pît e a spacavin pieris cuntun mai (Carlo Sgorlon, Prime di sere); artiscj a stomi crot a mangjavin stope e a spudavin fûc, a spacavin cjadenis cul stomi, a tiravin curtìs cuintri une bree e cjans amaestrâts a balavin su dôs gjambis (Alan Brusini, Come tai romançs)
   Sin. rutice
   Cfr. cjadenaç , anel , rincje , rincj , clostri
2. s.f. sfilze di maiis finis di metal, ancje preziôs, doprade sedi par tignî leât cualchi complement dal vistiari sedi dome par ornament:  lui al someave un siôr: la gjachete vierte sul gjilè a cuadrei, la cjadene dal orloi di arint (Alan Brusini, Come tai romançs); il siôr i lasse une cjadene di aur che al meti al frut cuant che al è grant, e ancje un pôcs di bêçs che lu inscueli, e cuant che al à finît dodis agns che lu mandi là di lui (Andreina Nicoloso Ciceri, Pipeta Sclagarot - Racconti popolari friulani I)
   Sin. cordon
3. s.f. spec. tal pl., sorte di rêt di cjadenis di montâ su lis gomis dai veicui par no sbrissâ su la nêf o su la glace:  in autostrade al è oblic di vê lis cjadenis in machine o lis gomis di nêf za montadis dai 15 di Novembar ai 15 di Avrîl
4. s.f. [CO, TS] mec. strument di trazion o trasmission di divers mecanisims:  onzi la cjadene de biciclete
5. s.f. ce che al ten leadis personis, cjossis, situazions:  simpri plui a strent nus vuelin peâts daprûf de lôr barache; simpri plui curte a vuelin che e sedi la cjadene che nus ten saldâts ai lôr interès (Josef Marchet, Che si tirin in bande e che nus lassin tirâ flât)
   Sin. leadure , leam , leant , peant , relazion , union
6. s.f. complès formât di plui elements leâts un cun chel altri:  il Cumierç Just e Solidari e je une relazion paritarie fra ducj i sogjets ingaiâts te cjadene mercantîl (Buteghe dal Mont, Luche Nazzi, Guide par un consum just e solidâl); bisugnave che la cjadene di control politic de politiche linguistiche no ves anei debii (Adrian Cescje, Memoriis di politiche linguistiche)
7. s.f. rie di personis che si judin:  i operaris a fasin une cjadene par passâsi i modons; «Fasìn cjadene [par passâsi aghe e studâ il fûc]! … Salvìn ce che si po salvâ…» al sberlà il predi «fin che e je aghe tal poç.» (Pieri Menis, Sflameadis)
8. s.f. complès di ditis de stesse proprietât:  une cjadene di ristorants; une cjadene di supermarcjâts
9. s.f. complès di monts:  in gjenerâl il clime de mont furlane al profite de disposizion di ovest a est de Cjadene Cjargnele e de sô elevazion, che e limite la influence des fuartis corints setentrionâls (Mauro Pascolini, Andrea Guaran, La mont furlane)
10. s.f. sfilze di acjadiments, spec. negatîfs:  chest an e je une cjadene di disgraciis che no finìs plui
    Sin. corone , filaine , filze , litanie , rie , rieste , rosari , schirie , secuence , serie , sfilze
11. s.f. [TS] edil. trâf orizontâl de struture dal cuviert, che e ten sù il cavalet
12. s.f. [TS] edil. viôt arpe¹
13. s.f. [TS] artes., tess. leadure tes acis par che a restin in ordin

Polirematichis e espressions idiomatichis

• a cjadene loc.av., loc.adi.inv.
• meti in cjadenis loc.v.
• reazion a cjadene loc.s.f.
• tirâ la cjadene loc.v.

Proverbis:

• lis feminis si leilis pe peraule, lis vacjis pe cjadene