Dizionari de Lenghe Furlane

rie  ri|e  [FO]

1. s.f. segn lunc e fin o robe che e à une forme o un percors lunc e fin:  la rie blancje dal confin e varès vût di lâ daûr dal paralêl gjeografic al milesim (Tarcisio Venuti, La cjase di Toni)
   Sin. bande , fasse , striche , linie
   
   1. ognidun dai tocs luncs, fins e paralêi che a formin un tiessût o dai segns luncs, fins e paralêi che a son stampadis sore:  none Luzie, fate sù tun grumâl a riis grisis e neris […] e jere indafarade cu lis citis sul spolert (Alan Brusini, Come tai romançs)
   2. cualsisei robe lungje e fine o cuntun percors lunc e fin:  une gnot o jeri plen di fiere e o viodei la imagjin di un strolic! […] Cuant che al moveve la man al lassave une rie di fûc! (Checo Tam, Ombris); scaturît il cjaval par la neif al scjampava / e Vissens parsora che al savariava: / la neif a la bagnava cu na ria di sanc, / i vui si ju platava cu la sô rossa man (Pier Paolo Pasolini, Il soldât di Napoleon)
2. s.f. file di personis o di robis:  di là da la Aghe che il cîl al ven sù di daûr de rie dai pôi e il Tiliment, grant, nol finìs plui cul so lavio dut riât di aghe (Dino Virgili, La aghe da pît la cleve); i zovenats dal paîs a disevin di lâ a messe e invezit a stavin dentri dome cinc minûts tes ultimis riis des bancjis o dongje de puarte (Checo Tam, Mater Tenebrarum)
   Sin. file¹ , schirie
   
   1. sucession o cuantitât di personis, robis, elements, fats e v.i.:  e veve braçolât e figotât une rie di nevôts (Maria Forte, Cjase di Dalban); la int, che e je stade scotade une rie di voltis, e à nasât a colp la manovre (Riedo Pup, I furlans e lis tabelis)
      Sin. file¹ , schirie , sfilze , serie
3. s.f. segn lunc che si viôt tra dôs alis di cjavei petenadis une di une bande e une di chê altre:  il Signôr al ordenà a sant Pieri di petenâlu. Al puartave i cjavei a la nazarene e sant Pieri cul disgredei i faseve la rie (Catarine Percude, Il voli del Signôr)
   Sin. spartidure
4. s.f. ognidune des secuencis di peraulis di un test scrit che a son ae stesse altece te pagjine:  cuant che la letare e fo publicade interie […], tes primis riis si podeve lei che al jere stât «in cjase dal Lutignint» (Pierluigi Visintin, Friûl e furlans te Histoire de ma vie di Giacomo Casanova); inte ultime rie di dut il sfuei, da pît dal sonet, o leìn «Origjinâl da conservâsi» (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie)
   Sin. linie
   
   1. (fig.) test, pal solit avonde curt:  par no fâ misteris o scugnarai meti jù ancje culì une rie di spiegazion (Luigi Gortani, Al marcjât di Vile); al tirà fûr une cjarte, si sigurà che il penin al jere bon, po al butà jù dôs riis di scriture cu la man come imberdeade (Maria Forte, La tiere di Lansing)
5. s.f. imprest par dissegnâ liniis dretis:  une rie di sessante centimetris; un dissen fat cun rie e compàs
6. s.f. (zerg.) strissule piçule e strete che si prepare par tirà sù cul nâs droghis in polvar:  tirâ sù une rie di cocaine
7. s.f. [TS] telecom. segnâl lunc tal codiç Morse:  une usme scognossude, une rie, un pont, letaris che no son peraulis, peraulis che no son lenghe (Stiefin Morat, Kebar krossè)
   Sin. linie

Polirematichis e espressions idiomatichis

• a riis loc.av., loc.adi.inv.
• fâ stâ in rie loc.v.
• meti cuatri peraulis in rie loc.v.
• meti i vues in rie loc.v.
• meti in rie loc.v.
• meti trê peraulis in rie loc.v.
• tignî in rie loc.v.
• tirâ une rie loc.v.

Proverbis:

• trê robis in rie, il diaul al strie