Dizionari de Lenghe Furlane

leam  /-àm/  le|am  [FO]

1. s.m. toc lunc e stret di un cualchi materiâl, doprât par strenzi o par peâ:  va sù tal scansel che tu sâs, che a son bêçs strents tun leam (Maria Forte, La tiere di Lansing); chel di Paisatti al jere un negozi che si cjatave di dut, dai fidelins al fier di sopressâ, dai leams di scarpe ai cjapiei di stran, al sardelon di vinars sant (Pieri Menis, Il «comandatôr»)
   Sin. coree , curdele , curdon , fliche , laç , leande , leant , peam , peant , striche
   Var. leamp
2. s.m. (fig.) ce che al oblee a fâ alc, che al da un oblic morâl o juridic o ancje ce che al impedìs e al fâs di ostacul:  i Conseîrs regjonâi a rapresentin la Regjon interie cence nissun leam di mandât (Aministrazion Publiche, Statût Speciâl de Regjon Autonome Friûl-Vignesie Julie); bisugne scombati fuart par disgredeâ i leams ingangrenîts dal capitâl e i siei vecjos mûts di lavorâ, par concuistâ la libertât dal lavôr e la juste paie (Pieri Somede dai Marcs, Un pugn di moscjis)
   Sin. impegn , oblic , peam , vincul , pastorie
3. s.m. (fig.) ce che al met o al ten in relazion, in union:  ancje se in chel moment [il telefonin] al jere mut al rapresentave pûr simpri un leam cul mont (Franca Mainardis, Grivôr); Leni lu judave. E jere il leam fra lui e il vivi (Maria Forte, La tiere di Lansing)
   Sin. puint
4. s.m. (fig.) relazion economiche, politiche, culturâl e v.i.:  i lôr rapuarts cui stâts dal Commonwealth fûr da la Europe a son plui strents e plui impuartants che no i leams che a puedin vê cui popui di Europe (Josef Marchet, Federazion europee tra nazions o tra regjons?); rinfuarcî i leams cun chês altris minorancis linguistichis de Europe e, massime, cun chei altris popui ladins (Donato Toffoli, Relazion dal Grup di lavôr "Planificazion linguistiche")
   Sin. leande , peam
5. s.m. (fig.) relazion sentimentâl o di parintât, afinitât, interès e v.i.:  cumò une Lanzine e jere vignude in cjase, cul leam de parintât (Dino Virgili, La aghe da pît la cleve); il don de amicizie, dal stâ insiemi, dal strenzisi cul leam de solidarietât (Antoni Beline, Sant Jacum, là che al finìs il mont)
   Sin. leande , relazion , union , peam
6. s.m. (fig.) rapuart logjic, causâl, funzionâl e v.i.:  la biologjie e à capît il leam tra DNA, RNA e proteinis, ma no sa inmò cuâi che a son i fatôrs che a àn puartât a doprâ il lengaç (Lorenzo Marcolini, Recension di La scienza non ha bisogno di Dio)
   Sin. conession , corelazion , interdipendence , leande , leant , peant , relazion
7. s.m. [TS] chim., fis. fuarce di atrazion che e ten adun atoms o moleculis
8. s.m. [TS] inform. peraule, imagjin o altri element che se al ven clicât al rimande a une altre pagjine o document:  clicâ su chest leam che al puarte ae bancje di dâts regjonâl "Amministrazione trasparente" (ARLeF, www.arlef.it)