Dizionari de Lenghe Furlane

puint  /-ì-/  puint  [FO]

1. s.m. costruzion che e passe e che e permet di passâ parsore di aghis, fossôrs o ancje parsore di stradis:  l'umbriçon dal mont par lui al jere il puint de ledre in Coscjâl, trê trâfs e sîs breis butâts su la roie che e rive di Grions (Agnul di Spere, Il puint de ledre); a rivavin ae puarte di Sant Pieri, al domo cu la place par lâ jù sul puint dal Diaul tun slambri di vert e di lûs, che subit dopo al jere Borc di Puint (Alan Brusini, Come tai romançs); sul puint di Braulins / al è passât un asin / cu la cossute / plene di luvins (Popolâr, Sul puint di Braulins); a vevin taiât la culine par fâ sù un puint, e sot e passave la strade gnove, che e lassave fûr il paîs (Carlo Sgorlon, Prime di sere)
   Var. pont , punt
   Cfr. testade , stilade , parepet , travadure , pile , arc , spalete
2. s.m. (fig.) element di union, di colegament:  [il vecjo Dalban al sperave di] viodi la musute di chel picinin che al varès puartât il so non indenant tai agns. Come un puint jenfri il passât e l'avignî de famee (Maria Forte, Cjase di Dalban); il patrimoni linguistic dai arlêfs al ven incressût cu la creazion di puints continuis tra lis lenghis e rivant a une comprension ricetive des lenghis "vicinis" (Patrizia Pavatti, La tutele de lenghe furlane a scuele)
   Sin. colegament , leande
3. s.m. (fig.) vacance fra doi dîs di fieste:  martars e je fieste, alore lunis al è puint
4. s.m. [TS] mar. ognidun dai plans orizontâi di une nâf:  dopo viodudis lis cabinis, la sale di gustâ, chê des fiestis, la verande e lis machinis, ju ai compagnâts adalt a viodi il puint di comant e la pissine (Vico Bressan, Cîl e aghe)
5. s.m. [TS] autom. intun veicul a motôr, as denant o daûr cu la trasmission interne
   Sin. puint dal motôr
6. s.m. [TS] tecn. supuart dai arbui des ruedutis dintadis di un orloi
7. s.m. [TS] med. protesi che e cjape il puest di dincj che a mancjin e che si poie su dincj ancjemò bogns
   Sin. protesi a puint
8. s.m. [TS] anat. part ventrâl dal metencefal:  il tronc dal encefal (indulà che si puedin ricognossi la medole slungjade, il puint, il mesencefal e il cervelet) (Franc Fari, La evoluzion dal çurviel e de cussience tai vertebrâts)
9. s.m. [TS] edil. plan di breis o breons li che si cjamine intune armadure
10. s.m. [TS] marang. bree di 35-40 mm

Polirematichis e espressions idiomatichis

• puint di sant Marc loc.s.m.
• puint jevadôr loc.s.m.

Proverbis:

• aghe cidine e ruvine i puints, lime sordine e ruvine lis cjasis
• il misteri de Santissime Trinitât al è plui grant dal puint maiôr
• la aghe e ruvine i puints e il vin il cjâf