Dizionari de Lenghe Furlane

arc  arc  [FO, TS]

1. s.m. arme di vuere, di cjace o sportive par trai frecis, formade di une aste lungje e elastiche che aes dôs estremitâts i si fisse une cuarde in tension:  Apol […] al copà Piton cuntune frece dal so arc (Adrian Cescje, Viaç aes origjins dal Logos); i siei gnerfs a jerin come la cuarde tirade di un arc (Gianni Gregoricchio, Trê feminis)
2. s.m. struture architetoniche verticâl di forme plui o mancul semicircolâr, vueide tal mieç, che e permet di distribuî il pês di mûrs o struturis che a son parsore sui supuarts dal arc stes:  sot i arcs di Marcjât vieri, tal clâr e scûr dal soreli e de ombre, e spietà un moment prime di traviersâ (Maria Forte, La tiere di Lansing); dentri i arcs a ridevin pituris plenis di agnulins (Maria Forte, I arcs)
   Sin. volte , volt¹
   Cfr. rande , clâf
   
   1. struture de stesse forme, ma dome decorative o celebrative e ancje di materiâl no edilizi:  une grant fieste, bandierinis pardut, cualchi arc di vert in prin dai borcs (Pieri Somede dai Marcs, L'ultin cordo); la place e jere dute nete e furnide di arcs e galis e bandieris (Pieri Menis, Il fiâr dal plevan)
3. s.m. forme a sezion di cercli o robe che e à chê forme:  e veve ceis sutilis, a forme di arc, come dissegnadis cul lapis (Carlo Sgorlon, Ombris tal infinît); cun dut il so dolôr ingjavât tes grispis de muse ruspiose… vadì ancje tal arc de schene, ta chel tremâ des mans (Dino Virgili, La aghe da pît la cleve); la spuinde e lave, tun arc lunc e viert, dal cuel de insenadure, viers miezegnot fin a une ponte che si slançave de bande di soreli a mont cuntune creste di crets scûrs (Agnul di Spere, Int no consumade)
   Sin. volt¹
4. s.m. schirie di elements che a formin une linie plui o mancul curve:  cun dute la valade des Parts e dal Podê e l'arc grant des monts devant (Dino Virgili, Cuel Valâr)
5. s.m. [TS] mus. imprest fat di un bachet flessibil, che al ten in tension grene o altris fibris, che si passe su lis cuardis di un strument musicâl par fâlu sunâ, e par estension ancje strument a arc o musicist che al sune chel strument:  «E là jù insom» al dîs il so amì mostrant la cise dai arcs dai violins […] «viodistu Gurin che intant che lui al sune culì, la femine a cjase cuissà ce che cumbine!» (Alan Brusini, Al Macalè); si sintivin lis cialis come une musiche di arcs platâts tal vert (Pieri Menis, Sflameadis)
   Sin. archet
6. s.m. [TS] artes., tecn. imprest formât di un len che al ten in tension un fîl par taiâ la arzile e fâ modons:  «Môf chel poleâr, gnogno! Sêstu indurmidît?» e jù une pache cul arc di fâ modon, par traviers de schene (Pieri Menis, La scuele dai fornasîrs)
7. s.m. [TS] gjeom. part di une curve cjapade tra doi ponts
8. s.m. [TS] anat. segment di circonference di un orghin
   
   1. trat curvât di une struture vascolâr, di un gnerf, di un vues
9. s.m. [TS] polit. complès di fuarcis politichis:  de Democrazie Cristiane al Partît Comunist, passant par chei altris partîts dal arc costituzionâl, ducj a someavin sodisfats de gnove organizazion aministrative (Max Mauro, Un Friûl difarent: i 90 mhz di Onde Furlane)
10. s.m. dade di timp:  la trasformazion si le viôt tai dâts eletorâi suntun arc di timp plui lunc (Sergio Cecotti, Il risultât eletorâl dai partîts di identitât teritoriâl - A case study: Scottish National Party); intal arc di sîs zornadis (Mario Turello, Il brevet)
    Sin. zîr

Polirematichis e espressions idiomatichis

• arc di sant Marc loc.s.m.

Proverbis:

• l'arc di Sant Marc la sere, bon timp si spere, l'arc di Sant Marc la doman, no ven mai sere che nol sedi pantan