Dizionari de Lenghe Furlane

clâf  clâf  [FO]

1. s.f. imprest, pal solit di metal, doprât par sierâ o vierzi une sieradure:  il muini al rive là, al impire la clâf te clavarie, al cloche la sieradure, al sburte e al jentre spalancant la puarte (Riedo Pup, I furlans e il muini); a jerin avonde amîs che siôr Dree i veve fintremai lassât la clâf dal lûc (Roberto Ongaro, Cretevierte); la crassigne si siere miôr cun doi zîrs di clâf, ma bisugne lâ a planc par no ruvinâ la sieradure (Maria Forte, Il bal spisimât des ombrenis); il nono al veve sierât il camarin cuntun lochet grues e si puartave simpri ator lis clâfs (Checo Tam, Sante); si palpe te sachete la clâf par sigurâsi di vê sierât l'automobil (Pieri Menis, Ta la ombre dal santuari)
   Cfr. mantie , anel , cane , pietin , segret , mac , sieradure , clavarie
   
   1. tant che simbul di autoritât, podê, comant e v.i.:  tignî lis clâfs de imprese
      Sin. tamon , brene¹
   2. tant che simbul di viertidure, di ospitalitât:  ufrî lis clâfs de citât
2. s.f. (fig.) ce che al permet di capî, di interpretâ alc o di rivâ a di un ciert risultât:  la clâf di dut ce che al à fat chenti il patriarcje Bertrant e je alì: diliberâ il Friûl di dutis lis cjadenis che lu tignivin leât aes caretis forestis (Josef Marchet, Il patriarcje Bertrant); un algoritmi che al permet di criptografâ la informazion par rindile acessibil dome al utent designât, parcè che dome lui al cognòs l'algoritmi, vâl a dî la clâf, par interpretâle (Valentino Castellani, La societât de informazion: cirint lis origjins)
3. s.f. peraule, numar e v.i. che al permet di decifrâ comunicazions in codiç, risolvi zûcs:  cjatâ la clâf di un rebus
4. s.f. lûc strategjic di impuartance fondamentâl pe economie o pe difese di un teritori:  la isule di Malte e jere calcolade la clâf dal control dal Mediterani te seconde vuere mondiâl
   
   1. ancje in funzion di adi.inv., che al à une impuartance decisive:  il gardenâl al saveve plaçâ i siei oms di fiducie intai puescj clâf intun sisteme che al veve ancje a ce viodi cul nepotisim (Fabian Ros, La invenzion dal stât)
5. s.f. [CO, TS] edil. piere tal mieç di un arc, fondamentâl par che al stedi sù:  al veve za fat puartâ pilastris e arcs di piere e lis clâfs dai volts ben picadis (Maria Forte, La tiere di Lansing)
   Sin. clâf dal arc , clâf dal volt , sieraie
6. s.f. [CO, TS] tecn. dispositîf di metal par cjariâ imprescj a suste:  zirâ la clâf dal orloi a mûr
   Cfr. clavute
   
   1. [CO, TS] mus. dispositîf di metal par acuardâ struments musicâi a cuarde
7. s.f. [CO, TS] tecn. imprest cuntune forme che si adate a chê di bulons o altris parts, par invidâ o disvidâ:  passimi la clâf numar doi par chel bulon
   Sin. clâf inglese ipon.
8. s.f. [TS] tecn. imprest di metal par dreçâ i dincj de see
   Sin. clâf de see , stradessee
9. s.f. [TS] tecn., artes., agr. element di metal o di len che al covente a tignî dongje parts diviersis di un stes imprest:  la clâf de cjavine
10. s.f. [TS] mus. intai struments a cuarde, piçul element di len o di metal che, cuntun moviment rotatori, al regole la tension de cuarde
11. s.f. [TS] mus. tai struments a flât, imprest mecanic che al vierç e al siere cualchidun dai bûs dal strument
12. s.f. [TS] mus. segn grafic che al vierç il pentagram segnant la altece des notis
13. s.f. [TS] arm. tes sclopis cu la cane che si vierç su di un manaçon orizontâl, element de part sore dal bloc di sieradure, doprade par vierzi la arme
14. s.f. [TS] fer. dispositîf che al fisse lis sinis tai traviersagns
15. s.f. [TS] sport te lote, prese su di une articolazion, par fâle movi in sens contrari a chel normâl

Polirematichis e espressions idiomatichis

• sierâ a clâf loc.v.
• sot clâf loc.av., loc.adi.inv.

Proverbis:

• il segret al è la clâf dal cûr
• la clâf di aur e vierç ogni puarte
• la poltronarie e je la clâf de miserie
• lis clâfs di aur a vierzin dutis lis puartis
• sant Roc i da la clâf a ogni pitoc
• sant Simon i da la clâf al so paron