pont  /-ò-/  pont  [FO]

  1. s.m. segn grafic fat di un piçul cercli plen:  il pont fer che al siere la frase (Vladimír Petkevič, trad. di Zorç Cadorin, Corpus linguistics); une rie, un pont, letaris che no son peraulis, peraulis che no son lenghe (Stiefin Morat, Kebar krossè)
    1. tant che part di ciertis letaris
      Sin. pontut , puntin
    2. in algjebre, metût fra doi numars, al segne la moltiplicazion
    3. metût adalt o in bas par segnâ i miârs
  2. s.m. cualsisei robe avonde piçule che si puedi viodi:  si viôt tal cîl parsore chei trê dincj che e scusse Mont Cjanine un piçul pont neri, e un ucielut imburît come une clapade al ven jù tai prâts di Solescjan (Catarine Percude, L'ucielut de Mont Cjanine)
    Cfr. magle
    1. spec., in espressions negativis, cuantitât une vore piçule, nuie:  «Ah nol è pont di dubi, varan senza altri za fat ju aparecjos pal me riceviment» (Zuan Luîs Filli, Il grant citadin); cence savê un pont di scriture (Maria Forte, Mabile la Lunghine)
      Sin. fregul , gran
  3. s.m. [TS] gjeom. element primitîf cence estension definît dai postulâts:  considerìn il pont individuât dai ponta A, B e C
  4. s.m. [TS] telecom. segn convenzionâl intal alfabet Morse fat di un impuls che al dure pôc
  5. s.m. lûc, puest determinât:  il nestri pont di cunvigne al restave Colorêt (Gianni Gregoricchio, Trê feminis)
  6. s.m. lûc esat di un test, di un discors:  si scuen dî che Livius, in chest pont [dulà che al fevele de fondazion di Aquilee], al scrîf robis impussibilis o contrastantis (Josef Marchet, Cuintristorie dal Friûl fin sot la Italie)
    Sin. articul , cantin , pas
  7. s.m. cuistion specifiche, argoment particolâr:  il Friûl orientâl al à une esperience di vite autonomistiche durade dal 1860 al 1918 che il Friûl Udinês nol à. E su chest pont il Friûl Orientâl al à une sensibilitât che noaltris no podìn trascurâ (Josef Marchet, In cercje di democrazie); la liste si podarès slungjâle, ma chest nol menarès dongje ponts gnûfs pal nestri studi (Zorç Cadorin, Cualchi ipotesi sul furlan di prin di scrivilu); un dai ponts di fonde di ogni tutele linguistiche al jere stât tes nestris convinzions l'insegnament de lenghe intes scuelis (Adrian Cescje, Memoriis di politiche linguistiche)
    Sin. argoment , articul , cantin , cantin articul , cuistion , nucli , probleme , element
    1. probleme, cuistion plui dificile e impuartante:  e scugnive fâsi judâ di cualchidun. Eco il pont: cu la sô scaltrece, e veve pensât di fâsi volê ben di cualchi famee in grant (Maria Forte, Mabile la Lunghine); Eco, juste! chest al è il pont, tu devis lavorâ e strussiâti in ogni maniere par cirî di sostignî, di judâ cui che al lavore […], ma a ti cui pensial? (Pieri Somede dai Marcs, Un pugn di moscjis)
      Sin. probleme , cuistion , grop , vues
  8. s.m. moment determinât:  a di un pont si sint a vuicâ i cancars de puarte che e da su la strade (Meni Ucel, La ombrene)
    Sin. moment
  9. s.m. grât determinât:  la dificoltât mostre e consist tal cognossi el pont just de bulidure e tal savê ben dosâ la cuantitât dai rîs e dai sesarons (Arturo Feruglio, Viaç a Vignesie)
    Sin. grât1 , nivel
  10. s.m. tonalitât minime di colôr:  e jere une vere sagre di ros, di blanc, di narancin, di blu, di ogni pont di colôr (Franca Mainardis, Un bosc cence colôrs); ogni colôr di fûc al dave tant cjalt; plui fuart o plui morentât. E par une arzile al voleve chel pont e par chê altre ancjemò un altri (Maria Forte, La tiere di Lansing)
    Sin. bave , gradazion , ninin , pêl , ponte , spêl , at
  11. s.m. situazion li che al è rivât un procès dinamic, une ativitât, un lavôr, une esistence, un fenomen e v.i.:  in chest mondat, cun tantis rivoluzions e cun tante democrazie che si predicje, o sin simpri a chel pont: di une bande la siorie e di chê altre la puare int (Josef Marchet, Lis predicjis dal muini); a ce pont jerino i programs di iluminament public a Udin? (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
    Sin. fase , situazion , cundizion , nivel , grât1
    1. (fig.) estrem intune dinamiche ideâl:  o jeri curiôs di viodi fin a ce pont che al veve esagjerât (Alan Brusini, Gian Paolo Linda, I forescj)
      Sin. misure , nivel , estrem , grât1
  12. s.m. trate di fîl che e passe par dôs busutis fatis de gusiele tal cusì, tal mendâ, tal comedâ e v.i.:  tirâ la gusiele cent e cent, mil e plui voltis, passe e torne passe, pont daûr pont su chei cotulons di regadin, sui gjachetins di bavele e fîl stuart (Pieri Menis, Marum); marcjanzie par contadins che no fasevin riflès su la lungjece dai ponts, ni come che a jerin metûts sù i tacons (Maria Forte, Il bal spisimât des ombrenis)
    Sin. norie , pontât
    1. cuside:  cuant che àn di paiâmi a disin: «uh! cussì cjâr, par un sblec, par un tac, par un pont» (Pieri Somede dai Marcs, Une scarpute); Modestute si inzegnave ancje a dâ cualchi pont, si che, une dì, Riche, la sartore, le tignì cun se a cusî (Pieri Menis, Cui si jerial impaçât cun Modestute?)
    2. ognidun dai grops dal fîl te gucje, tal crossè, te tiessidure, tes rêts e v.i.:  un di chei ponts che se si tiriju, si disfe dute la maie (Roberto Ongaro, Cretevierte); no mi ven ben, no sai parcè ma o fâs fadie a contâ i ponts epûr mi pâr di no vê sbaliât, no volarès che mi tocjàs disfâ dut un zîr di fiers (Pieri Somede dai Marcs, Il prossim); manuâi scrits dai tiessidôrs li che si metevin adun progjets par tiessûts, tipologjiis di stofis e ponts (Erika Adami, Cjargne, tiere di tiessidôrs)
      Sin. maie
    3. [TS] chir. ogni element di suture fate par sierâ une feride:  mi veve pontât un fier […] Par fâle curte: façolet leât a strent, e vie a cjase. Po dopo mê sûr mi menà li dal miedi a Merêt in dute premure: cinc ponts (Lucio Perès, Tal Cuar)
  13. s.m. ogni unitât convenzionâl doprade par esprimi une valutazion, une cuantificazion e v.i.:  dopo la sperimentazion il grât di acuardi al è calât di cuasi un pont (Carlo Cecchini, Matteo Fogale, Une esperience di plurilinguisim inte didatiche de matematiche)
  14. s.m. ognidune des unitâts dopradis par esprimi un vantaç in sports, zûcs o sim.:  Zuanin al puartà cjartis, zes, e la breute dai ponts (Dino Virgili, La aghe da pît la cleve); Gusto al saveve di vê il capon (la briscule) a la ultime man e cun chel a jerin 59 ponts (Checo Tam, Se ti perdi tuo danno)
  15. s.m. unitât in licencis, permès, ativitâts e v.i. che a previodin un massim e un minim:  «Âstu pierdût ducj i ponts de patente?» (Cristina Noacco, Faliscjis); o vin fate cuote e vuadagnât 5000 ponts in cheste stagjon di cjace (Checo Tam, Sense)
  16. s.m. bolin o sim. dât cun prodots di consum, che, dongje di un ciert numar di altris intune cierte dade di timp, al da dirit a vê premis, sconts, promozions e v.i.:  fâ la racuelte dai ponts dal supermarcjât
  17. s.m. viôt pont percentuâl :  L'andament des opzions tai cinc agns di aplicazion de leç a nivel regjonâl al regjistre, dopo il câl di 10 ponts dal prin al secont an, une percentuâl plui o mancul costante (Patrizia Pavatti, La tutele de lenghe furlane a scuele)
  18. s.m. segn grafic che, ancje in maniere aprossimative, al rapresente un sun di une lenghe:  sô mari, che no jere buine di lei, la puartà a une comari di li dongje preantle di lei i ponts di chê letare (Pieri Menis, Sul agâr); cumò i ponts de scriture a jerin nûts su la piere sgrifignade (Dino Virgili, La aghe da pît la cleve)
    Sin. letare , segn
  19. s.m. [TS] mar. posizion là che e je une nâf intal mâr in rapuart cu la longjitudin e la latitudin
    Sin. posizion
Polirematichis e espressions idiomatichis Proverbis:
  • cui che al scjampe un pont, ind scjampe mil
  • cui che nol fâs il grop al piert il pont
  • cui che tal fîl nol fâs il grop al piert il pont
  • lis feminis ind san un pont plui dal diaul
  • tirâ il pont tant che si po, ma dâi a ognidun il so
  • trê feminis a puedin dâi un pont al diaul

Altris Imprescj

Coretôr Ortografic

Il coretôr online pai tescj furlans.

Dizionari Bilengâl
Talian-Furlan

Il plui complet dizionari dal Talian al Furlan (passe 76.000 lemis) e no dome.

Dizionari des Formis

Par cognossi la flession dai lemis furlans: la coniugazion pai verps e la declinazion pai nons e adietîfs.

Sinonims e Contraris

Par cjatâ la juste peraule.

Lenghis

La plataforme didatiche pe scuele furlane.