Dizionari de Lenghe Furlane

estrem  /-èm/  es|trem  [AF]

1. adi. il plui lontan che si pues tal spazi:  il Friûl al colà tal mieç de Vuere Frede: deventât l'estrem confin orientâl al veve di jessi il plui talianon di ducj i teritoris talians (Dree Venier, Acuilis e canarins); Vladivostok, la stazion plui estreme e orientâl de Transiberiane (Angelo Floramo, Il misteri dai Mosaics)
   Sin. finâl , terminâl , ultin
   
   1. che al rapresente il tiermin ultin tal timp, spec. te vite:  ce orende sorte mai lu lei, fin la ore estreme, / a la forcje, a la stragje, al sanc, fin l'ultin flât… (Ercole Carletti, Guere!)
      Sin. conclusîf , finâl , terminâl , ultin
   2. (fig.) che al è insom, al massim, intune cierte cualitât o categorie o intun ordin logjic e v.i.:  il "moviment nazionalitari" al lave dal Moviment Friûl ae estreme çampe passant pai predis di Glesie Furlane (Max Mauro, Un Friûl difarent: i 90 mhz di Onde Furlane)
   3. (fig.) che si sburte, che al rive fin al limit:  al è un amant dai sports estrems (Natascia Gargano, Vegnin jù, vegnin jù… vincint il Premi Friûl)
2. adi. une vore grant, considerabil, rimarchevul:  si poiave sui cussins, intune debilece estreme (Carlo Sgorlon, Il dolfin); ma e je une seconde robe, che o varès di dîle cun estreme scletece (Francesc Placerean, Nadâl nus fâs capî che la storie e je plui profonde e biele di chel che e somee)
   Sin. considerabil , enormi , esagjerât , imens , impuartant , insuperabil , rimarchevul , sovran , spropositât , straordenari
3. s.m. part terminâl di alc:  a dâi fuart su un dai estrems [il pindul pandul] si jevave in aiar: bot e sclop, bisugnave becâlu al svol e tirâlu il plui pussibil lontan (Dree Venier, Esistial un sport furlan? Forsit a Glemone…); l’arc di orizont jenfri i doi estrems si clame amplitudin ortive (Nando Patat, Archeoastronomie in Friûl)
   Sin. cjaveç , fin² , limit , margjin , ôr , orladure , pic , piche , poc² , ponte , spiç , estremitât
   
   1. posizion une vore lontane di une altre:  doi estrems a esistin in fuarce di ce che al sta tal mieç, che ur da reson di jessi ma che tal stes timp ju condane a stâ simpri lontans l'un di chel altri (Raffaele Serafini, B123ST)
   2. ultime dade di timp
4. s.m. [TS] logj. tiermin de conclusion di un silogjisim
   Sin. conclusion
5. s.m. [TS] mat. prin o cuart tiermin di une proporzion:  intune proporzion il prodot dai medians al è compagn dal prodot dai estrems

Proverbis:

• i estrems a son pericolôs