Dizionari de Lenghe Furlane

fin²  fin  [FO]

1. s.f., s.m. pont o moment li che alc al finìs, al termine, al cesse e v.i.:  Efrem al jere rivât in Tiere Sante, la fin dal so viaç, il lûc che al veve desiderât di viodi di cuant che al jere un fantat (Carlo Sgorlon, Il dolfin); intant, come che vin dit, i doi pescjadôrs, pari e fi, jerin arivâts al fin del lôr viaç (Federigo Comelli, Il me paîs); in chest mont, si sa, dut al à une fin, e cussì e finì ancje chê brute vuerone, combatude ancje tra int de stesse çocje, tra fradis (Pieri Menis, Zilugne); si sa che dut in chest mont al à un fin e cussì ancje lis stravagancis di Mondo Muraie (Pieri Menis, Chei di Muraie); la fin di une culture e je come il vignî a mancjâ di une rose tal zardin de nestre moderne civiltât (Riedo Pup, Al jere une volte il furlan); una specia di anticjamera tant vasta, che no si viodeva da nissuna banda il fin (Zuan Luîs Filli, Il grant citadin)
   Sin. conclusion , tiermin , finâl , finiment
   
   1. muart:  la brute fin di Rico e pesave sul lôr cûr; chê muart e veve butade une magle su la famee (Pieri Menis, A uciei cu lis archetis); dentri [te letare] e jere scrite la fin dal puar soldât (Catarine Percude, Il cjan blanc di Alturis)
   2. (fig.) situazion che si cjatisi dopo di un ciert fat o schirie di fats, ancje no cognossûts:  che nus disi ce fin che a àn fat i nestris ricors (Alviero Negro, Int di masnade); cuissà là che al è / cuissà ce fin che al varà fat / cuissà il progjet, la destinazion (Giorgio Ferigo, Ventura di mille-mieli)
      Sin. sorte , destin

Polirematichis e espressions idiomatichis

• a fin di ben loc.adi.inv., loc.av.
• a la fin loc.av.
• ae fin loc.av.
• brute fin loc.s.f.
• cence fin loc.av., loc.adi.inv.
• fâ fins loc.v.
• fâ la fin dal gjat loc.v.
• in fin dai conts loc.av.
• in fin dai fats loc.av.
• in fin dal cont loc.av.
• viodi la fin loc.v.

Proverbis:

• il contadin nol à mai fin
• Sant Martin al fâs il so fin
• se al svinte a Sant Valantin, cuarante dîs nol à fin