Dizionari de Lenghe Furlane

pruc  pruc  [CO]

1. s.m. [FÛ, TS] arch., lit. (ant.) pulpit, plan metût adalt cun parepet, ancje sculpît o decorât, di li che il predicjadôr al fâs il sermon:  la storie de nestre Glesie Maiôr, vulgo Domo, nissun ancjimò le à scrite e nissun nancje nol à dit nuie sul cont di chest mestri di prucs, che al veve non Toni e che, puar diaul, al scugnive lavorâ a gridince (Josef Marchet, Pruc)
   Sin. pulpit
2. s.m. [CO] plan par poiâ alc o par montâ parsore, fat di cavalets e breons:  suntun pruc di breis il cjantestoriis cu la ghitare in man al cjantave (Dino Virgili, La aghe da pît la cleve); la fieste di Sant Pieri, o di mieze stagjon, e jere stade preparade sot il tachil a pôcs pas dal lodar. Suntun pruc al jere stât preparât il puest pal caratel, cuntun baldachin di frascjis di pin (Pieri Menis, Une letare par Bepo)
   Sin. pruchil , prucar
   Cfr. puint , breâr , armadure
   
   1. [FÛ] (ant.) banc par meti in mostre robe di vendi
3. s.m. [CO] banc, bancje, mobil, ancje une vore sempliç, cuntun plan orizontâl di len, li che a puedin sentâsi plui personis:  erin massa invidâts e par chest nus à menâts ta stali, sentâts sun biei prucs furnîts di clauts, che a comedarin benon il cûl a ducj (Domenico Molfetta, La fieste dai Straulinârs di Sudri)
   Sin. bancje , banc
   
   1. mobil de stesse sorte, ma par une persone sole:  po ce creustu che no seipo / che tu sentos sun doi prucs! / sta mo atento che un nol mancji, / che tu letis a trabucs (Fabio Barbaceit, Zelosie); a vevin una biela cort e a metevin bancjas e prucs par sentâ (Orsola Moro Valle, La prissission di Prioula)
      Sin. scagn , scagnut , bredul
   2. banc par inzenoglâsi
4. s.m. [CO] cjar cence spuindis o cence stadeis:  e jere stade la file dai prucs a menâ vie il modon (Maria Forte, La tiere di Lansing)
   Var. pruchil , prucar
5. s.m. [CO] rilêf o part alte di un rilêf, spec. di une culine:  a vevin bataiât a lunc su lis monts crotis di Gurize: l'assalt ae baionete cul zaino su la schene par cjapâ un pruc di claps e un rodul di fîl spinât. E doi dîs dopo, sot lis canonadis, ducj in ritirade (Alan Brusini, Come tai romançs); mi ricuardi las vôs / dai zovins sul pruc / in onôr… in favôr…/ contin i nons, la sperança, / i amôrs di un paîs (Leonardo Zanier, Las cidulas)
   Sin. çuc , cuc³
   Var. spruc
   Cfr. cime , spice , spiç , ponte , piche , insom