Dizionari de Lenghe Furlane

corone  /-ò-/  co|ro|ne  [FO]

1. s.f. ornament pal cjâf a forme di cercli di metal, pal solit preziôs, simbul di regalitât, autoritât o di trionf:  in glesie, il tabernacul di aur, i cjandelîrs, la corone de Madone sul cjâf e il cercli dai Sants a jerin di aur (Alan Brusini, Come tai romançs); ritrats di individuis impuartants, gardenâi, magjistrâts, ministris, marchês, damis cu la corone sul cjâf (Carlo Sgorlon, Ombris tal infinît)
   Cfr. diademe
2. s.f. (fig.) podê regâl:  sedi i whigs che i tories a decidin alore di fâ ricors al protestant Vielm di Orange par ufrîi la corone (Fabian Ros, La invenzion dal stât)
   Sin. ream
   
   1. spec. cun iniz. maiusc., la persone juridiche dal re o la istituzion monarchiche:  il Friûl al gjoldeve di une grande autonomie rispiet ae corone che e steve a Pavie (Angelo Floramo, Ri-cognossi la autonomie)
      Sin. re¹ , ream , monarchie
3. s.f. ornament di fueis e di rosis di meti tal cjâf, massime in cualchi celebrazion:  la corone de nuvice; si tignivin prontis lis coronis di ulivâr pai vincidôrs des garis (Adrian Cescje, Viaç aes origjins dal Logos)
   Sin. zoie , ghirlande
4. s.f. zoie grande di rosis o di fueis, in gjenar doprade tant che ricognossiment funerari o comemoratîf:  e vignarà poiade une corone al monument dai muarts in vuere (Erika Adami, Cormons capitâl furlane)
5. s.f. cualsisei robe o schirie di robis in forme plui o mancul di cercli:  une largjure di infinît, cence distacâsi des robis, cul cîl viert li parsore, une corone di monts lontanis, une vongule di cuei, e la tiere vive e crote sot i pîts (Dino Virgili, La aghe da pît la cleve); si veve lassât cressi une barbute a corone intor la muse che al someave Sant Samuêl (Maria Forte, Il Bide di Miot); al butà jù il vin che al faseve tor ator dal veri la corone di boi dal neri sincîr (Maria Forte, La tiere di Lansing)
   Sin. anel , cengle , cinture , curnîs , rincje , suaze , zîr
   
   1. grup di personis, soredut se a son dadis dongje in cercli:  al cjatave simpri une corone di plaçarûi a spietâlu su la puarte, par dâi une man (Maria Forte, La rive di Sant Pieri)
   2. conformazion naturâl in forme di cercli o di arc di cercli su la rive di une mont
6. s.f. sorte di golaine che e covente par tignî il cont des preieris te recite dal rosari:  muiniis che la sere a disevin rosari te cjamare dongje, inzenogladis e la corone in man (Alan Brusini, Come tai romançs); i asins de corone a sunavin come coculis sbatudis tun sac (Pieri Menis, Il testament)
   Cfr. gran , asin¹ , rosari , avemarie , glorie , parinestri
   
   1. preiere pronunziade in maniere ritmade e ripetude, sedi judantsi cun chê sorte di golaine, sedi plui in gjenerâl a memorie, ancje in riferiment a preieris che no son dal rosari:  biade mai jei chê persone / che a dirà cheste corone / nûf viaçs la not di Nodâl (Luigi Gortani, Tradizioni popolari friulane)
7. s.f. sucession di robis o di avigniments leâts tra di lôr:  se al jere copât un todesc un paîs brusât nol jere masse par paiâlu, e la corone dai flagjei e dai dispiets e scomençà (Francesc Placerean, Cuintristorie dal Friûl dal 1866 fint in dì di vuê)
   Sin. schirie , serie , sfilze , rie , cjadene
8. s.f. numism. monede doprade in plui puescj e plui etis, par esempli ancje tal imperi asburgjic:  cualchi corone o cualchi marc tal sachetin dal gjilè si lu veve ducj (Josef Marchet, Lis predicjis dal muini); stant che che la corone austriache no valeve plui nuie o vin scugnût molâ di lavorâ e o sin tornâts a cjase (Matteo Ermacora, La emigrazion furlane in Austrie e in Gjermanie)
9. s.f. mec. la part esterne di une ruede di ingranaç
   
   1. ruede dintade che si môf cui pedâi de biciclete e che e môf la cjadene:  i dincj a son fruiâts e la cjadene e salte jù de corone
10. s.f. [TS] tecn. pirul che al ven infûr de casse dal orloi par cjariâlu
11. s.f. [TS] mus. segn circolâr cuntun piçul pont che sore une note al dîs di slungjâle
    Sin. fermade , pont coronât
12. s.f. [TS] med., anat. struture anatomiche di forme circolâr
    
    1. part dal dint che e je fûr de zenzie
    2. protesi de part dal dint che e je fûr de zenzie:  dentieris artificiâls in vulcanite e aur, dincj a perno, coronis di aur, puints a la americane (Ernesto Licciardelli, Publicitât "Dentist American", cit. in Strolic furlan pal 1988)

Polirematichis e espressions idiomatichis

• a corone loc.adi.inv., loc.av.
• fâ corone loc.v.
• tapon a corone loc.s.m.

Proverbis:

• cualchi len al nas par indorâ, cualchidun par bati il mus e cualchidun par fâ coronis
• cuant che il diaul al devente vieli, al cjol sù la corone
• lis pomis ai fruts e la corone ai viei