fermade
/-à-/
fer|ma|de
[CO]
-
s.f.
azion di fermâ o di fermâsi:
Pauli al lavorave gobit tal sun net dal incuin; come simpri. Un colp daûr chel altri, e ogni tant une fermade par cjalâ la batude sul imprest (Maria Forte, Cjase di Dalban)
Cfr. interuzion
-
s.f.
puest li che cdn. o alc si fermin, soredut in riferiment a mieçs di traspuarts publics che si fermin par permeti ai viazadôrs di montâ e di dismontâ:
Pieri al montà su di un bus che al passave par li. Al dismontà a la tierce fermade, te place dal domo (Amedeo Giacomini, Tal ospedâl)
-
s.f.
timp che si reste fers intun puest:
po ancjemò indenant, fin a Minsk; e, dopo doi dîs di fermade, jù fin in Ucraine… (Pieri Menis, Zilugne)