Dizionari de Lenghe Furlane

sflocje  /-ò-/  sflo|cje  [AF]

1. s.f. conte inventade o tradizionâl cun elements di fantasie:  i fruts a durmî e ce si vevie di burî fûr di miôr par fânus capitâ la sun e cori sù plui svelts a platâsi disot da plete se no cualchi sflocje ancje di chês di une volte? (Dolfo Zorzut, No je plui vive)
   Cfr. flabe , conte , storie
   
   1. componiment popolâr che al ven recitât o cjantât, dispès cence tante coerence di forme e di contignût:  «Checo beco, sta sul fen …››, «L'era na volta, Pieri si volta…››, «Tintina, tintona, cui balia là sù? …» a son nainis e sflocjis che mê mari e cjantuçave dispès (Celso Macôr, Jentrade a Sacheburache)
2. s.f. robe inventade o false, cence corispondence cu la veretât o cu la realtât:  no stin po nancje a fevelâ de stampe: dutis lis sflocjis, dutis lis bufulis che un sfuei al po presentâ ai siei letôrs, a puedin cjatâ cualchi gnogno disponût a crodi (Josef Marchet, Il pietin e il grop); la vuere no si fasarès mai. Tant e je vere che i politicants vuerîrs a scuegnin obleâ la int a fâle. […] E a scuegnin imbussulâle cun ogni sorte di sflocjis (Riedo Pup, Vitoriis e batostis)
   Sin. bagule , bausie¹ , bombe , bufule , buzare , cabule , conte , falope , fote , pancjanade , sflandocje , storie , flabe , sflandogne , bale , naine , liende , invenzion , trombonade , pataracje