Dizionari de Lenghe Furlane

bufule  /bù-/  bu|fu|le  [AF]

1. s.f. formazion plui o mancul sferiche di gas dentri di un licuit o cjapade dentri di une superficie particolâr o che si forme o che e reste intun ciert materiâl:  ce maravee, un sgrisul di bufulis sul mâr che al pareve un pedrât (Alan Brusini, Come tai romançs); si formin lis bufulis che a mostrin la emission di aghe da la vene in profonditât (Lorenzo Marcolini, L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane); un veri splanât mâl […] dulà che cualchi bufule di aiar i è restade impresonade (Franco Marchetta, Madalene)
   Sin. bol²
   
   1. (estens., ancje fig.) formazion plui o mancul taronde, ancje no tignude dentri di une superficie:  la pipe ongjarese i poiave sul stomi, e spandeve bufulis di fum (Maria Forte, Il Bulo di Crodio)
   2. (fig.) forme sferiche:  si fevelavin par mieç di un microfon che al jere dentri te bufule di veri-casc (Checo Tam, Sense)
2. s.f. sorte di sache che si forme jenfri i strâts de piel, o in câs in altris tiessûts organics ancje vegjetâi, che si jemple di sîr, par vie dal freâsi de piel stesse, di scotadis, lesions, alergjiis e v.i.:  cu lis mans sglonfis, implaiadis e plenis di bufulis (Roberto Ongaro, Il muc)
   Sin. vissie
3. s.f. [AF, TS] anat. orghin interni in forme di sache che al fâs di dipuesit de urine:  chel stâ distirât tal clip dai linzûi, dismenteantmi parfin de bufule sglonfe che mi dûl, mi sabore fantasiis (Alan Brusini, Gian Paolo Linda, I forescj)
   Sin. vissie , balon
   
   1. becj., gastr. chel orghin di bestie macelade, doprât in particolâr par insacâ gras di purcit:  dôs bafis di ardiel, la bufule dal saìn, trê stangjis di salam, cuatri piecis di formadi e ce ancje? (Josef Marchet, Lis predicjis dal muini); al dave un cuc ae pile dal pestât e a lis vasis dal ont e a lis bufulis dal gras (Dino Virgili, La massarie); i fantats a zuiavin di balon cuntune bufule di purcit sglonfade (Alan Brusini, Come tai romançs)
4. s.f. (fig.) robe false, declarazion false o esagjerade:  e cumò par zonte ti comandin di lâ in Lombardie a contâ bufulis e a ti sbalotin cemût che a vuelin (Pieri Somede dai Marcs, Un pugn di moscjis); cetantis bufulis che nus àn contadis sul cont de democrazie, su la nature sacre des leçs, su la grande e nobile mission di cui che lis met adun (Josef Marchet, L'esempli di adalt)
   Sin. bagule , bale , bombe , falsetât , flabe , luianie , naine , sflandogne , stoc¹ , menade , sglonfadure , berlete , bulade , buleç , canonade , fanfaronade , fole³ , lasagnade , sflocje , spacade , spaconade , spampanade , trombonade

Polirematichis e espressions idiomatichis

• sglonfâ la bufule loc.v.