Dizionari de Lenghe Furlane

balon  /-òn/  ba|lon  [CO, FO, TS]

1. s.m. bale sglonfade di aiar doprade in plui sports:  viodi chei cuatri che a corevin sù e jù daûr dal balon (Cristina Noacco, Faliscjis); il frut mi domande di zuiâ a bale cun lui e mi bute il balon su la taule (Max Mauro, Un Friûl difarent: i 90 mhz di Onde Furlane); dal prin gno balon di corean (chei balons di une volte cu la coree) o jerin parons a miezis jo e Franco (Ivano Urli, Storie di Vera)
   Sin. bale
2. s.m. [CO, TS] sport (par anton.) dome sing., zûc fat di dôs scuadris di undis zuiadôrs suntun cjamp di jerbe, che a àn di mandâ dentri il balon inte rêt contrarie tocjantlu cui pîts o cul cjâf:  chê partide e jere pardabon impuartante, e jere la finâl dal campionât mondiâl di balon, a Buenos Aires (Agnul di Spere, Usgnot partide di balon); mi insumiavi di vê un album cun dutis lis stemis des scuadris di balon de Europe (Checo Tam, Subbuteo); zuiâ di soldaduts o di balon (Angelo Floramo, Cuintristorie dal Nûfcent 1970-1980)
   Sin. fobal
3. s.m. [CO, TS] sport massime intal zûc dal fobal, tîr, passaç o ocasion di fâ une zuiade:  [il portîr] nol à nuie ce fâ parcè che ai atacants de formazion emiliane no ur rivin balons di zuiâ (Marc Stolf, Sassuolo - Udinese 0-0)
   Sin. bale
4. s.m. [CO, TS] anat., becj. vissie urinarie di une bestie, che une volte dopo lavorade, e podeve coventâ par insacâ robe purcine, par fâ contignidôrs, balis di zuiâ, parelums, e v.i.:  un balon di purcit; un balon di cjastrât
   Sin. vissie , bufule
5. s.m. [CO, TS] med. cundizion patologjiche li che un volt dal intestin, ancjemò dentri dal peritoneu, al finìs fûr de sô posizion naturâl e si sburte tal scrot:  Durì, se a ti vignìs […] la piere, la roture e lu balon (Ermes di Colorêt, I, 35); i cuatri gnovissins dal om son: prima i ocjâi, secont il baston, tiars la goba e cuart il balon (Ranieri Mario Cossâr, Storia dai trê nerans)
   Sin. ernie scrotâl , ferâl , roture , pilote²
6. s.m. (fig., coloc.) viôt coion :  cuant che Ecuba vedint, che so marît / faseva il bulo, in chê figura strana / "O puar balon!" cridà […] (Zuan Josef Busiç, La Eneide di Virgjili)
   
   1. in espressions par dî di alc o di cdn che al stufe, che al secje e v.i.:  "Sâstu ce balons, Montàg: ti dan la promozion, ma ti oblein a dutis chestis nainis" (Stiefin Morat, Kebar krossè)
      Sin. pâr di balis , dôs balis , pivide , magon , barbe¹
      Cfr. bale , coion
7. s.m. aerostat cence motôr, sglonfât cuntun gas plui lizêr dal aiar:  e Çorut tel balon, in grant divise, / cui siei tramais induès, / a lâ sù sù svolant, / compagnât dai sivîi de baronie (Pieri Çorut, La viele)
   Sin. mongolfiere
8. s.m. globi di membrane une vore fine e elastiche, pal solit colorade, sglonfât di aiar o gas lizêr, doprât come element di decorazion o par zuiâ:  se un mac di balons, magari di chei molâts dai fruts a Sante Catarine, al sorpasse il lôr aroplano e si piert lontan par devant o par in bande dal lôr aereo, lu scambiin par un «caccia» militâr (Riedo Pup, I voi dai pilotis)
9. s.m. sorte di piçul lampion, fat cuntun parelum sferic o taront cun dentri une piçule cjandele, doprât une volte fâ lum e par bielece in fiestis o fieris:  a gnot i venezians e i forestîrs a capitin a gjoldi il spetacul tes barcjis e tes gondulis fodradis di balons (Arturo Feruglio, Viaç a Vignesie)
   
   1. piçul lampion de stesse sorte, ma cun altri sisteme di iluminazion:  grant ligrie, grant sunsûr di musichis, grancj lampadaris e balons eletrics (Arturo Feruglio, Viaç a Vignesie)
10. s.m. (fig., fam.) persone grasse o sglonfe:  la puare femine e jere deventade un balon che si strassinave indevant su lis gjambis che a semeavin doi muducs. "Colpe de flebite, chê sfondrade!" (Gianni Gregoricchio, Îr e doman)
    Sin. bale , baghe
11. s.m. grampe di nêf cjapade e fracade cu lis mans, di butâ cuintri di chei altris par zûc:  si cjate il grant solêf / a fâ balons di nêf. / Il puar balone il siôr, / il client il dotôr; / il mestri dal scuelâr, / il mus dal peçotâr, / si fasin balonâ, / balons di ca e di là (Pieri Çorut, La nêf e i barons di place)
12. s.m. toc di spongje dât dongje par jessi tignût o vendût intîr
    Sin. pan¹
13. s.m. cuantitât di materiâl dade dongje:  sgjarpî un balon di lane (Gianni Gregoricchio, Trê feminis); un balon di spongje (Pieri Menis, Il Signôr sul mûr de braide)
    Sin. bale
14. s.m. cualsisei robe grande di forme plui o mancul taronde:  i lamps a sclapavin fûr par fûr il cîl plen di nûi, che a corevin a balons bas e neris, puartâts vie dal aiar (Pieri Menis, Il burlaç)
15. s.m. tai pipins dissegnâts, sorte di nûl blanc li che a son lis peraulis ditis o pensadis dai personaçs
    Sin. nûl , fumut

Polirematichis e espressions idiomatichis

• balon tal zei loc.s.f.
• lâ in balon loc.v.
• sglonfâ il balon loc.v.
• tignî sù il balon loc.v.
• vê il cjâf come un balon loc.v.

Proverbis:

• a sglonfâ masse il balon, al sclope