Dizionari de Lenghe Furlane

barbe¹  bar|be  [BF, CO, FO, TS]

1. s.f. pêi che a cressin te part basse de muse:  barbe dure; barbe rice; barbe di frari; barbe rosse; une ponte di barbe bionde sot la bocje (Maria Forte, Cjase di Dalban); intant, lavâsi, fâsi la barbe, vistîsi come par partî (Alan Brusini, Gian Paolo Linda, I forescj); al veve molade la barbe, al fevelave a scjas, nome i voi a jerin ancjemò chei di une volte… ma cetant plui vecjo che al someave (Pieri Menis, Sul agâr); un vieli ben tressât, vistût di scûr e cuntune lungje barbe sâl e pevar (Franca Mainardis, Grivôr); fraris cu la barbe blancje, secs e strissinîts come sardelons (Pieri Somede dai Marcs, Ta la ombre dal santuari)
   Cfr. mostacje , baf
2. s.f. (fig.) om:  ducj insiemi a formavin un gran circul e a lavin ator ator sivilant, di fâ pôre a cualunche barbe (Pieri Menis, Lis leiendis di Buie)
3. s.f. [BF] part basse de muse, ancje cence pêi e ancje di femine:  tu le fasis scjaldâ tant di podê resisti dentri [une misture di arzile e asêt], po tu metis in muel lis zimulis fin avuâl de barbe, e tu lis tegnis dentri par un cuart di ore (Riedo Pup, I furlans e lis medisinis); sentade tun banc cu lis mans sot la barbe, e steve a cjalâ chê Madalene (Zuan Lurinçon, La Madalene)
   Sin. barbin¹ , barbuç , barbete
4. s.f. pêi che a cressin sot dal music di ciertis bestiis, spec. des cjavris:  la barbe dal bec
   Sin. barbete
5. s.f. [CO] lidrîs fine
   
   1. [TS] bot. lidrîs di tierç ordin
6. s.f. (fam.) robe o ancje persone che e stufe, spec. in esclamazions:  "Ce barbe" e pensave la frute, e si disponeve a ubidî (Carlo Sgorlon, Ombris tal infinît)
   Sin. bale , brût² , lagne , luianie , mignestre , naine , sope , broade , solfe

Polirematichis e espressions idiomatichis

• barbe di bec loc.s.f.
• barbe di diaul loc.s.f.
• barbe di frari loc.s.f.
• barbe di om loc.s.f.
• fâ la barbe loc.v.
• fâ vignî la barbe loc.v.
• fâ vignî la barbe lungje loc.v.
• fâsi la barbe loc.v.
• in barbe a loc.prep.
• servî in barbe e piruche loc.av.
• vê la barbe blancje loc.v.

Proverbis:

• barbe ben savonade e je mieze fate
• barbe rosse pêl di diaul
• bisugne fâ la barbe prin par se e po, se al vanze timp, ancje a chei altris
• la barbe il ben di un dì, la femine il ben di un mês, il purcit il ben di un an