Dizionari de Lenghe Furlane

mignestre  /-és-/  mi|gnes|tre  [AF]

1. s.f. pitance cun brût e un o plui ingredients, tant che verduris, ortaie, liùms, patatis, pastis, rîs, vuardi e v.i.:  une buine mignestre di vuardi e fasûi, ben cuinçade cu lis crodionis (Giovanni Gortani, Il viaç di Vidisson); e vin sercjât une famose mignestre veneziane: risi e bisi, rîs e sesarons, che al vignarès a stâi (Arturo Feruglio, Viaç a Vignesie)
   Cfr. sope , mignestron , brût¹
   
   1. (par anton.) la robe di mangjâ in gjenerâl, soredut chê plui semplice, tant che bisugne fondamentâl:  lis umiliazions di vignî scuedude in public, di viodisi a dineâ la mignestre (Roberto Ongaro, Il muc)
      Sin. bocjade , pan¹ , pagnut , polente
2. s.f. (fig.) situazion, ancje in relazion al fat di lâ indevant o di jessi puartade indevant in cualchi maniere:  zaromai o pensavi che nol jere mût di vignî fûr di cheste mignestre (Stiefin Morat, Donald dal Tiliment); o vin tacât a fevelâ di Statût speciâl cuant che o vin viodût cemût che si stave cuinçant la mignestre a Rome (Josef Marchet, Par intindisi)
   Cfr. polente , fertaie
   
   1. situazion che si caraterize pal fat di jessi compagne o diferente di une altre:  "Jo […] o 'nd ai tancj dai miei intes sfonderis di cjadaldiaul, e tant e tant o me la gjolt l'istès." "Cheste a è une altre mignestre - al dîs Sant Pieri. - Volêso metisi cun me, voaltris? […]" (Luigi Gortani, La invidiose); deve di viodi di vê capide la menade dai guviars di îr e di vuê, bogns di visâsi de puare int nome cuant che e serf par mandâle a murî. «E vuê» al sberghelave «bisugnarès gambiâle chê mignestre»; tant par dî che la mignestre e jere simpri chê (Alan Brusini, Alpin jo mame!)
      Cfr. storie , cuistion , afâr
   2. situazion o discors che al va masse in lunc e che al stufe:  sai che no us plasarà cheste mignestre; / ma per la umanitât, par la inocence, / se ben che no mi tocje, / vuei fevelâ fin che ai la lenghe in bocje (Pieri Çorut, L'asîl)
      Sin. broade , brût¹ , panade , sope , 'suf

Proverbis:

• a impaçâsi cun canaie, la mignestre e pie di fum
• cuant che il soreli al va a mont, la mignestre a sa di ont
• femine cence gracie pôc e vâl tant che la mignestre cence sâl
• i rîs a son la mignestre plui buine e la plui triste
• i vûl inzen a fâ la mignestre cul len
• il jet cjalt al fâs la mignestre frede
• la mignestre e fâs deventâ grancj
• mignestre riscjaldade a fâs dolôr di panze
• mignestre riscjaldade no à durade
• mignestre riscjaldade no je mai buine
• servitût tornade, mignestre riscjaldade