Dizionari de Lenghe Furlane

bocjade  /-à-/  bo|cja|de  [FO]

1. s.f. cuantitât di mangjâ che si rive a meti in bocje intun colp:  al consegnà il plat a Trasaghis e al viodè la fertaie a sparî tune batude di voli, in trê o cuatri bocjadis (Riedo Pup, I furlans e la creance)
   
   1. une cierte cuantitât, no tant grande, di mangjâ:  une pagnoche di pan ogni nûf presonîrs, di spartîsi une bocjade par om (Ivano Urli, Storie di Min)
      Sin. fregul , ninin , bocon , toc¹ , tic¹ , fruçon
2. s.f. un past sempliç e svelt:  Jacum une joibe dopo vê fat marcjât a Udin, al è lât a mangjâ une bocjade ae Acuile Nere (Angelo Covazzi, Colpe de aghe)
   Sin. crust , crustin
3. s.f. mangjative, robe che si mangje, soredut par tignîsi sù, par vivi:  la int, une volte tirât fûr il fit pal paron e il cuartês pal plevan, […] e à simpri scugnût misurâ la bocjade (Riedo Pup, I furlans e la culumie)
   Sin. pan¹ , pagnut
   
   1. ce che al covente par vivi:  o soi chel e chel: sartôr e rivendiul e l'istès o stenti a tirâ sù la bocjade… (Alviero Negro, Int di masnade)
4. s.f. (ancje fig.) respîr, tirade di flât:  il camarero al de fûc al spagnûl di une bande intant che di chê altre Julius al tirave une bocjade di fum (Fabian Ros, Eivissa mon amour); mi ven voie di lâ un fregul ator a cjapâ une bocjade di aiar (AAVV, Sul florî)
   
   1. pôc timp, ce che al covente par tirâ flât:  cuant che la procession e tornave in glesie, lui al jentrave il prin, al poiave un moment chê Crosone dongje il Batisteri e al polsave une bocjade (Riedo Pup, Vigji Strassanît)

Polirematichis e espressions idiomatichis

• mandâ jù la bocjade loc.v.
• misurâ la bocjade loc.v.
• parâ jù la bocjade loc.v.

Proverbis:

• dulà che e sta une bocjade di pan e po stâ ancje une peraule
• la piore intant che e bebee e piert la bocjade