Dizionari de Lenghe Furlane

sope  /sò-/  so|pe  [AF]

1. s.f. pitance fate di pan, in gjenar sec e brustulât, metût tune scudiele e cuviert di brût cjalt:  la none e veve finît di preparâ il pan pes sopis par chei che a tornavin de messe di miezegnot. A di chê ore la vilie e jere finide e un brût di gjaline, pardabon, al va par ogni aìne (Pieri Menis, Chei di Muraie); sul cjadenaç e trote une stagnade di brût pes sopis (Osiride Secco dai Juris, Lis antighis sagris di Tarcint)
   
   1. (estens.) pitance licuide o cremose fate di plui ingredients:  a nô doi nus tocje fâ rindi fin a sere chê agarole di sope di rauçs che o vin parade jù a sîs di matine (Ivano Urli, Storie di Min)
      Sin. mignestre
      Cfr. creme , passât
2. s.f. fete di pan tocjade tal lat e tal ûf e frite:  taiâ il pan a fetis e passa ognidune prime tal lat e po tal ûf sbatût e, subite dopo, frizi te spongje. Meti lis sopis indoradis suntun plat di puartade e passaur parsore un spolvar di zucar (Lucian Verone, Sopis indoradis)
3. s.f. toc di pan, o ancje biscot o sim., tocjât in cualchi licuit:  po a tacavin i modons dal pan todesc par fâ lis sopis tal vin blanc o neri (Alan Brusini, Gnoçade cosache a Tresesin)
   Cfr. tocje
4. s.f. (fig.) robe simpri compagne:  ancje ae seconde i jere tocjade la stesse sope (Andreina Nicoloso Ciceri, Trê sûrs - Racconti popolari friulani I)
   Sin. mignestre , solfe
   
   1. robe che e stufe:  e alore, i tocjave la sope des domandis, al «macaronì»: ce che al ves vût, se al steve pôc ben, se Parîs no i plaseve e ce che al veve lassât in «Italì» (Alan Brusini, Il mâl dal tor)
5. s.f. (fig.) messedum disordenât:  une sope indulà che si cjatin a jessi messedâts, cun cualchi alc di positîf […] un biel grum di distilâts irazionâi, di leterature, di falsificazions, di contradizions e di bufulis (Josef Marchet, Partide dople)
   Sin. mismàs , mignestron , messedum , messedot , misturon , misturot
6. s.f. (fig.) costipazion di nâs:  o restìn. Si crodeve di cjatâju distirâts in poltrone, cu la cuzine sui zenoi, e scjatulins di pirulis e potoriis sul taulin. «Ma cemût… cun chê sope… O sês za in vore…». (Sandri Secco dai Juris, La sgnape cu la magne)
7. s.f. (fig.) situazion negative, dure di sopuartâ o schirie di robis negativis, ancje di pachis:  «Ce mont, ce mont - al pensà - e ce sope par un puar vecjo che nol à mai fat mâl a di une moscje» (Maria Forte, Cinc malintopâts); par reson che si vei, si cjape in grope / simpri une buine sope (Fabio Simonutti Masolini, Lunari furlan cun regâi par l'an 1902)
   Sin. colp , legnade , petenade , bote¹ , sdramassade , sglavinade , sgnesule , vuadolade

Polirematichis e espressions idiomatichis

• prometi lis sopis al mus loc.v.

Proverbis:

• a balâ cu la sô femine, sopis ta la aghe
• sope cui poleçs, mangjâ di çafs