Dizionari de Lenghe Furlane

nûl  nûl  [FO]

1. s.m. masse di vapôr e di particulis licuidis inte atmosfere, ancje cun valôr coletîf:  al à plot vie pe gnot e i nûi bas a cuvierzin lis montagnis (Cristina Noacco, Faliscjis); un nûl neri e cjamât di ploie nol prometeve nuie di bon (Franca Mainardis, Aiar di cjase); scurît il soreli sot di un bâr di nûl grîs, la campagne si jere inmusonade (Pieri Somede dai Marcs, Clâr e scûr); il cîl si jere scurît e de Basse e vignive sù une musse grise di nûl (Pieri Menis, Il fi de Rosse); a vignivin fûr cumò a planc e fis barcjons di nûi (Dino Virgili, La aghe da pît la cleve); i plasevin i amonts colorîts, i nûi a grenis tal cîl plen di aiar (Alan Brusini, Come tai romançs); la mont dal Jôf e veve un biel cjapiel di nûi sirocâi (Riedo Pup, I furlans e il timp); une zornadesse malsigure fra mostris di seren e sgjarpiduris di nûi (Maria Forte, Cjase di Dalban); un nûl penç, scûr, al pesave su lis cjasis come une grant cape di plomp (Pieri Somede dai Marcs, Sant Simon: 28 di Otubar 1917)
   Sin. niule
   Var. niul , nuli , niûl
   Cfr. balon , bâr , barcjon , ceon , cjavalon , cjistiel , jubâl , gradesane , grene , nulace , minusaie , musse , tabâr , tasse¹
   
   1. masse di cualchi sostance in sospension te atmosfere:  il nûl di cinise jessût fûr ae metât di Avrîl dal vulcan Eyjafjallajökull in Islande (Alessio Potocco, I trê aeropuarts internazionâi de Slovenie)
2. s.m. (fig.) element o aspiet in cualchi maniere negatîf:  cun cheste pene e cun cheste teme o stin a cjalâ il gnûf an che al nas daûr di un tabâr di nûl (Josef Marchet, Il cîl nulât)
   Sin. ombre , niule
3. s.m. (fig.) ce che al pues someâ a une di chês massis:  cuant che al menave la scove, al vignive un nûl di polvar (Lucio Perès, Vilie di fieste)
   Sin. niule
   
   1. grande cuantitât dade dongje intune masse cuntune forme pôc definide:  il nulon di int vie a cuatri di chê bande ducj cuancj a cjoli i musicants (Dolfo Zorzut, La furlane)
4. s.m. [TS] graf. tai pipins, sorte di suaze li che a son lis peraulis ditis o pensadis dai personaçs
   Sin. fumut , balon , niule

Proverbis:

• a Madone des cjandelis, se al è nûl o sin fûr, se al è clâr a mieç Invier
• al nûl e al cûr nissun no i comande
• cuant che al è nûl, al po plovi cuant che al vûl
• cuant che il nûl al va a soreli jevât, mole il bo e va pal prât; cuant che il nûl al va a soreli a mont, cjape il bo e va a disconç
• cuant che il soreli la joibe al va tal nûl, domenie al plûf sigûr
• cui che al abade ogni nûl no si met mai in viaç
• cui che al cjale ogni nûl no si met mai in viaç
• nuie nûl, nuie ploie
• nûl a lane al po durâ une setemane,
• nûl a scjalins ploie a sglavins
• nûl a scjalins, ploie a cjadins; nûl a barcjons, ploie a bleons
• nûl a scjalins, ploie a sglavins; nûl a barcjons, ploie a bleons
• nûl e cûl al fâs ce che al vûl
• nûl in mont, ploie in cont
• nûl lizêr la sere, bon timp si spere
• nûl ros la matine, la ploie e je vicine; nûl ros la sere, bon timp si spere
• par seren che al sedi il cîl, al è simpri un bâr di nûl
• parsore il nûl al è simpri seren