Dizionari de Lenghe Furlane

tasse¹  ta|sse  [FO]

1. s.f. grum di robis metudis une su chê altre cuntun ciert ordin:  e po in file medis di fassuts, mussis di palût e di soreâl par stierni, tassis di lens e di çocjis di sclapâ di Invier (Pieri Menis, Lis çuculis dal Gjigjo); a la cjatarin secja ta la tromba dal toglât: a doveva jessi sbrissada da la tassa dal fen e a veva batût il cjâf cui sa cemont (Novella Cantarutti, Il Crist sclagn); i fornasîrs che a savevin, lu cjolevin vie, su la ore dal mangjâ. Ancje chei sentâts lontan, su lis tassis dal madon (Maria Forte, "Nossent")
   Cfr. grum , mede , musse
   
   1. cualsisei struture o forme che e pues someâsi a un grum:  no si jere inacuart dal burlaç che al mungulave simpri plui vicin, ingrumant tassis di nûi di tampieste (Pieri Menis, Sul agâr)
2. s.f. cuantitât grande:  cemût si fasial a fâ cori un mês tun paîs come chest ca? Vessio almancul puartât cun me une tasse di libris! (Alan Brusini, Gian Paolo Linda, I forescj); trinceis, distantis une da la altre sì e no trente metris e dividudis di tassis di fîl spinât, fusîi e metraiis di une bande e di chê altre (Pieri Menis, Cemût che o soi restât caporâl)
   Sin. grum , mont¹ , sglavin , sdrume , slac , sdrum , sdrumarie , sdrumerie , folc , sdavàs , slavin , pestefruce , slavine , sglavine , maree , mac , lavine , flagjel , stermini , distermini , disordin , côl , stragje , stragjo , sfulmin , sac , baûl , straviodi²

Proverbis:

• salustri a la Basse, ploie in tasse